WILLEMSTAD.- Kuerpo Polisial ta partisipá ku entrante di djaluna 16 di yüni 2025, doñonan di vehíkulonan ku a keda kitá dor di polis i ku ta stashoná den kurá di warda di polis na Rio Canario, tin dos siman di tempu (pues te ku 30 di yüni 2025) pa por saka esakinan.

Di vehíkulonan ku a keda transportá ku kran pa warda, e doñonan mester paga gastu di e transporte, promé ku saka esakinan.

Únikamente outonan di kua nan dokumentunan (seguro, karchi di kùr i komprobante di impuesto) ta na òrdu por sali koré riba propio forsa.

Vehíkulonan di kua nan dokumentunan no ta na òrdu òf no ta den estado tékniko adekuá pa ta riba kaya, por sali solamente riba kran i bou di kondishon ku e vehíkulo aki no ta sigui sirkulá riba kaminda públiko.

Pa saka e vehíkulo for di warda, doño di e vehíkulo (prinsipalmente esnan ku no tin ningun dokumento), mester bini ku un prueba ku e vehíkulo ta di dje.

Vehíkulonan di kua nan doño no presentá denter di e dos simannan, lo tuma medida pa ku nan despues di konsultá ku outoridatnan kompetente.

Doño di vehíkulonan por tuma nota riba e página di facebook di Kuerpo Polisial Kòrsou òf un lista na e wardanan di polis, si nan vehíkulo ta entre esnan ku bou di e kondishonnan ariba menshoná lo wòrdu duná bèk. Por yama òf app e number di telefòn 6740049 pa mas informashon.