WILLEMSTAD.- Ayera tim di reshèrshe huntu ku tim di aresto a realisá dos aresto importante relashoná ku e kaso di asesinato ku sanger friu di e siudadano Gerald Nicolina konosí komo Chado di Penstraat dia 5 di febrüari tras di lomba. E dia ei Kòrsou a keda di shòk pa e forma kon e asesinato a tuma lugá, esta di dia kla, drenta den kas di e famia, pasa bai den kamber i tira nan víktima mata, miéntras e otro tabatin un pistol apuntá riba kabes di un otro siudadano den e kas.

For di einan un investigashon a start pa saka afó kiko por tabata motibu di un krímen di e índole ei por a tuma lugá.

Mester indiká ku den un tempu rèkòrt, polis a haña pista di esnan responsabel o sea di esnan ku lo por sa algu di e krímen aki.

Ayera tabata dje leu ei ku e tim di reshèrshe a pidi asistensia di Tim di Aresto pa realisá un entrada hudisial den un kas na Sta. Catharina, den kaya Cattalea.

E entrada hudisial aki a tuma lugá den kareda di 7.30 di anochi i inisialamente a detené kuater hende hòmber i kuater hende muhé ku no tin dokumentashon.

A detené e dos hòmbernan S.J.E.M. kurasoleño di 25 aña di edat i tambe M.M.V. di 30 aña di edat nasé na Sto. Domingo.

Polis a laga e otro hende hòmbernan bai kas, miéntras e kuater hende muhénan a haña un kuarto grátis pa keda na barak.

Ta fresku den memoria ainda kon riba e dia en kuestion, polis ta yega na e sitio i nan ta komprondé dor di testigunan ku  dos hòmber a yega na e kas en kuestion den un outo i baha bai paden. Una bes paden, un di nan a pone pistol na kabes di un habitante miéntras ku e otro a pasa bai den kamber i lòs algun tiru dirigí riba su víktima, ku konsekuensia fatal.

Despues di a kometé e krímen, e dos asesinonan a move bai for di e sitio den un outo, ku djis despues a bin resultá kimá den e área di Coronet.

Mester indiká ku ya tin dos aresto den e kaso aki, i no ta ekskluí ku lo por tin mas detenshon.