WILLEMSTAD.-EXTRA a tuma nota di moveshon interesante den haf awe mainta. Ta trata di e barku Zhi Yuan Kou, ‘semisubmersible’, di kua e parti mei mei ta sak bai basta profundo den awa d manera ku embarkashon por subi riba e plataforma mei mei. Riba e plataforma ei a subi dos barku ku ta Bourbon 106 i Bourbon 107. Bosero di Curaçao Ports Authority Sau Chong a konfirmá pa EXTRA ku e dos barkunan Bourbon ta rumbo pa nan doño nobo.

Pa hendenan ku ta pagatinu, nan lo por a nota ku na entrada di Damen tin algun barku kolo bèrdè ku blanku. Pasando riba Kaya Don Martina (Nieuwehaven) ta fásil pa mira algun di nan. Ta barkunan ku nan doño a stashoná na Kòrsou pendiente ora trabou sali pa nan bai kumpli ku esei òf manera a sosodé den e kaso aki, a haña benta pa dos di e barkunan aki.

Bourbon 106 i Bourbon 107 ta ‘offshore supply ship’. Den e kaso aki Bourbon 106 ta un barku ku a keda konstruí na 2008 i ta nabegá bou di bandera di St. Vincent Grenadines. Promé ku e yega Kòrsou dos aña pasa el a sali for di Rio de Janeiro i a nabegá 25 dia pa yega Kòrsou.

E dos barkunan aki awor ta rumbo pa China pa nan doño nobo.

E agente ku ta Dammers a intermediá pa asina tur e kompania i instansianan konserní kolaborá ku otro pa asina e barkunan por bai pa nan doño nobo. Tremendo kolaborashon di toubot, lots i otronan, asina sra. Chong a finalisá.