WILLEMSTAD - Bosero di Ministerio Públiko, Norman Serphos a kaba di informa ku awe mainta funshonarionan di Landsrecherche (LR) Kòrsou den koperashon ku Kuerpo di polis di Kòrsou (KPC) i Team Bestrijding Ondermijning (TBO) a ehekutá dos detenshon den un investigashon relashoná ku korupshon atministrativo (ambtelijke corruptie) den kuadro di pèrmit di estadia denter di e organisashon Toelatingsorganisatie (TO). Den kuadro di esaki a detené e hefe di TO, komo tambe su kolaboradó riba sospechoso ámbos di korupshon atministrativo, falsifikashon di dokumento i maluso di funshon. Esnan detené ta E.R.C. (51) i L.L.M.L. (47). Tambe a tene entrada hudisial. Esaki bou di liderazgo di un Wes-komisario i den presensia di un Fiskal di Ministerio Públiko (OM). Tambe a buska na algun ofisina den e edifisio di TO. Na e momentunan aki e entradanan hudisial ta andando ainda. Landsrecherche ta un instansia di investigashon ku tarea spesial. E ta dirigí su mes riba rastreo di komportashon ku ta tacha integridat di atministrashon públiko. Landsrecherche ta hasi investigashon solamente riba òrdu di Prokuradó-general (PG). Korupshon atministrativo ta un menasa pa un estado di derechi. Landsrecherche Kòrsou i Ministerio Públiko (OM) ta duna pa e motibu aki prioridat na investigashon den tipo di korupshon asina.