WILLEMSTAD – Awe mainta Kuerpo Polisial a hasi vários entrada hudisial kontinuando ku investigashon den e kasonan di atrako ku a keda kometé na tres minimarket riba respektivamente 31 di òktober 2021, 6 i 8 di novèmber 2021. E tim di atrako a realisá un detenshon. Tabata alrededor di 05.05’or, personal di tim di atrako a detené na Paranaweg e hòmber sospechoso M.M.F. nasé na Kòrsou di 20 aña di edat, relashoná ku e kasonan ariba menshoná. Despues di e detenshon tim di atrako a hasí un entrada hudisial na e adrès menshoná i a konfiská artíkulonan di importansia pa e investigashon.  A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.

Pa loke ta un otro kaso di atrako ku a keda kometé dia 25 di mei 2022 tambe na un minimarket, tim di atrako a realisá un otro detenshon.  Esaki tambe tabata den oranan di mardugá alrededor di 04.00’or ku personal di tim di atrako a detené na e krusada di F.D. Rooseveltweg i Mirla Plateweg e hòmber sospechoso A.M.F. nase na Kòrsou di 19 aña di edat, relashoná ku e kaso ariba menshoná. A presentá e sospechoso dilanti un fiskal ouksiliar ku a ordená su enkarselamentu pendiente di mas investigashon.