WILLEMSTAD.- Ayera durante di oranan lat di anochi un kantidat di patruya a keda dirigí pa Kaya Afghan na Souax despues di a risibí informashon di un kaso di bashamentu di bala ku lo mester tabatin na e sitio.

Na yegada di e patruyanan a topa ku tres hòmber heridá di kual sigur dos no tabata duna señal di bida.

 Mesora a sera e área pa kuminsá ku investigashon preliminar di parti e tim forénsiko.

Sigur tres ambulans a presentá na e sitio i a transportá e víktima ku a risibí bala na e parti ariba di su kurpa pa departamento di emergensia pa tratamentu médiko avansá i despues el a keda interná den departamento di kuido intensivo miéntras ku te na siere di nos edishon su situashon tabata hopi krítiko.

Dòkter di polis mas lat a konstatá morto di e dos otro hòmbernan ku a fayesé mesora na e sitio dje tiroteo.

Segun informashonnan ku tabata kore na e sitio por a komprondé for di algun testigu ku sigur mas ku dos persona a yega na e sitio lòs algun bala probablemente ku un arma outomátiko i pa despues hui na pia for di e sitio pa despues drenta un vehíkulo ku tabata na distansia pará.

E kaso lamentabel aki a tuma lugá na kas di un hóben barbero bon konosí den Souax.

Den nos edishon di mañan nos lo bini ku mas detaye di e kaso aki i tambe identidat di e dos víktimanan ku a pèrdè nan bida.