WILLEMSTAD.- Ministerio publiko di BES ta informá ku djaweps 5 di sèptèmber último a haña dos kurpa sin bida na bordo di e tankero italiano MT RBD GINO FERRETTI. E tankero ku ta nabegá bou di bandera Italiano, tabata na kaminda di Brasil pa Statia. Na kaminda, e kapitan a mèldu e insidente ku a pasa na bordo di su barku.

E kurpanan sin bida ku a haña na bordo ta di dos hòmber di 33 i 42 aña di edat di nashonalidat Filipino. Ta sospechá ku nan a pèrdè nan bida dor di un krímen. Un sospechoso di 43 aña, tambe di nashonalidat Filipino, a keda detené. Kuerpo di Polis Karibe Hulandes (KPCN) a investigá e kaso ku un tim di Boneiru i Statia a base di un petishon hudisial di Italia. A tende diferente testigu. A base di un petishon pa ekstradishon di Italia, a trasladá e sospechoso riba djaweps 12 di sèptèmber pa e outoridatnan Italiano ku lo sigui investigá e kaso mas aleu.