WILLEMSTAD.- Mayornan ku ta biaha ku nan yunan pa Ulanda tin di paga tinu, i mester kana ku tur dokumento ku ta proba ku e mucha ku ta huntu ku bo, ta bo yu.

EXTRA a risibí bishita di sigur dos mama ku a biaha ku nan yu pa Ulanda den luna di desèmber. Pero na nan salida for di Ulanda, a pasa den basta kos pa proba ku e mucha ku ta huntu ku nan, ta su yu. Esaki pasombra e yu no tabatin fam dje mama.

Un dje mama ku EXTRA a papia kuné a konta ku na su salida for di Kòrsou ku su yu hòmber menor di edat i entrada na Ulanda, tur kos a kana perfektamente bon.

Sorpresa grandi el a enkontra na momentu ku el a yega bali di e kompania di aviashon pa chek in. Komo ku e yu no tabatin fam dje mama, e mama mester a demostrá ku en berdat e mucha ta su yu. E mama no tabatin su buki di famia huntu kuné, tampoko otro tipo di prueba. Esaki a trese kuné ku hasta e mama aki a pèrdè su buelo i mester a bai ku e siguiente avion ku a sali pa Kòrsou. Esaki despues ku for di Kòrsou por a manda dokumentonan ku por proba ku e mucha ta su yu.

No a dura masha dia ku otro mama a pasa den mesun situashon. E biaha aki na bali di otro kompania di aviashon na Schiphol tambe a pidi e mama dokumentonan ku ta bisa ku su yu hòmber di 17 aña ku e ta biahando kuné pa Kòrsou, ta su yu di bèrdat. Sin e prueba e mama no por a bula ku e yu. E mama no tabatin su buki di kasamentu huntu kuné. Pa e mama aki su buena suerte e tabatin su sédula ku su fam kasa ainda riba dje. Asina e por a demostrá ku e ta mama di su propio yu hòmber di 17 aña.

Loke a indigná ámbos mama ta ku niun ora so ora nan a bai kumpra ticket na e kompanianan di aviashon aki na Kòrsou, no a notifiká nan òf rekordá nan ku mester kana ku dokumentonan ku ta mustra ku bo yu, ta bo yu, mirando ku nan ta biahando ku menor di edat. Ni ora nan a sali for di Kòrsou, no a pidi nan niun dokumento. Pues ta rekomendá biaheronan ku ta bai Ulanda ku yu ku no ta karga fam di un dje mayornan, pa tin e dokumentonan nesesario ku por proba ku e mucha ku ta huntu ku bo, ta bo yu.