WILLEMSTAD - Djárason, 10 - 10 - 2018, riba dia di Kòrsou, durante e selebrashon di Fiesta den Mi Bario, Kòrsou i spesialmente e pueblo di Brievengat a honra dos militar kurasoleño oriundo di Brievengat. Ta trata di Jayson Tecla i Dayrohn Wiesken.

Nan a demostrá determinashon pa pasa pruebanan hopi pisa i balentia demostrá durante operashonnan den teritorio di guera ku a resultá den kondekorashon haltu di Kas Real. Fundashon "Ban Huntu" ku ta un fundashon di militar i ex militarnan kurasoleño, huntu ku e organisashon di Fiesta den mi bario i Sentro di Bario Brievengat a pone man huntu pa realisá e seremonia impaktante aki.

Marlon Regales ku ta PR di "Ban Huntu" a bisa ku pa un kurasoleño pasa tur e pruebanan ei ta mas pisa ku normal paso bo tin ku bai den un kultura militar anto hulandes, nan ta papia otro, kome otro, komportá otro anto nan ta bisa bu ku lo bo no logra pero ora bo logra bo ta presta mas mihó paso bo prueba ta mas duru. E pueblo di Brievengat a demostrá di ta orguyoso di nan baluartenan.