WILLEMSTAD. - Ayera anochi algu promé ku e ora di toke de keda a drenta na vigor, Sentral di Polis mester a dirigí algun patruya ku urgensia pa Soto pa un kaso di tiroteo ku a tuma lugá.

Na yegada di e promé patruya, nan ta topa ku un outo marka Vitz ku vários perforashon di bala ku dos persona heridá den e outo. Tabatin un Mercedez Benz tambe ku glas kibrá resultado di e kantidat di bala ku e pistoleronan a lòs. Mester indiká ku e Mercedez Benz tabata na e sitio na e momentu robes. Esei ta loke ku EXTRA a komprendé na e sitio na di suseso.

E loke ku polisnan a haña na informashon, t’asina ku aparentemente dos persona a kana yega na un edifisio bandoná i dekaí ku ta keda otro banda di kaminda di e snèk ku e personanan aki tabata sinta den e outo.

E dos personanan aki a saka nan arma i a kuminsá lòs un kantidat grandi di bala. Despues di nan echo, nan ta kana bai bèk den e direkshon ku nan a bin.

E dos persona den e Vitz a keda heridá, pero afortunadamente no di tal gravedat ku nan bida ta na peliger.

A transportá e dos personanan aki den un ambulans pa poliklínika pa tratamentu. Manera ya menshoná nan situashon ta stabil, ounke un di nan a haña herida di bala na su garganta i e otro a haña bala na su brasa.

Mester indiká ku ta masha hopi perforashon di bala e outonan a haña i tambe e edifisio nan den bisindario a haña impakto di bala.

Polisnan di TOD a keda te lat pa investigá un ke otro.

Búskeda di e dos pistoleronan ta kontinuá.