WILLEMSTAD. - Polisnan ku a yega na un toko chines na Roi Santu awe mardugá a haña nan den un situashon konfuso kaminda a haña dos hende morto, un persona chines i e otro persona un posibel atrakadó.

Algu despues di 1’or di mardugá, Sentral di Polis mester a dirigí un patruya di polis ku urgensia pa Roi Santu na un toko chines pa un atrako ku morto ku lo mester a tuma lugá. Na polis su yegada nan a topa ku dos persona ku no ta duna señal di bida parti pafo dje toko.

Segun e informashonnan na e sitio, e pareha chines a yega kas i e dama lo a bai baha for di outo ora el a keda sorprende pa dos tipo. Unu lo a pushe i despues lo a surgi un forsageo ku a termina den tiramentu. No ta konosi kon e tiramentu a bai ya ku te awe mainta ainda polis tabata na e sitio hasiendo investigashonnan.

A haña si un arma di kandela, tambe un di e viktimanan tabatin maskara i handskun ahinda bisti. E otro viktima ta e homber chines.

Mas informashon te ainda ta sperando di polis. E suseso lamentabel aki a tuma lugá na Chi Chi Mini Market, banda di Bakerij de Zon. Deytaye di e kaso aki lo sigui durante di e dia di awe.