WILLEMSTAD.- Dos stazjer hulandes resientemente a pinta un imágen hopi negativo tokante un organisashon na Kòrsou, na unda nan a traha komo boluntario. Ta trata di un organisashon ku ta ofresé refugio na animalnan. E stazjernan ta bisa di a bini Kòrsou pa yuda e organisashon, pero a haña mal trato serka doño di e organisashon. Den relatonan basta largu nan ta konta nan eksperensia i a indiká esaki tambe ku potretnan.

EXTRA ta disponé di e relatonan aki. Den esakinan por lesa ku e doño a laga e stazjernan hasi trabounan basta pisá. Tambe semper el a reklamá tokante nan trabou i tabata hasi redu ku otro trahadó tokante nan dos. Banda di esei nan a sinti ku e doño no a kumpli ku palabrashonnan tokante nan alohamentu. Niun di e dos damanan no a keda hopi tempu na e organisashon. Nan ta wak bèk riba un eksperensia hopi amargo. Via ret sosial nan ke informá otro hende ku tin intenshon pa traha komo boluntario, òf despues di periodo di COVID-19, pa traha komo stazjèr pa esakinan sa kiko nan ta hinka nan kurpa aden. Den e mailnan nan ta menshoná number di e organisashon i e doño. Den su afan pa semper trata na skucha tur dos partido, EXTRA a tuma kontakto ku e doño i a skohe tambe pa no menshoná su nòmber. El a duna di konosé di ta sorprendí dor di e echo ku èks-boluntario ta pinta un imágen asina malu di nan eksperensia. Segun e doño mayoria di e stazjèr- i boluntarionan den e último añanan a keda na su lugá. Ku hopi di nan e tin hopi bon kontakto durante e periodo ku nan ta na Kòrsou, pero tambe despues di esaki. ‘Hopi di nan a bisa ku nan a traha hopi dushi aki. Pero mi tin ku bisa ku un òf dos di nan kos no a bai bon.’ Segun e doño un èks-boluntario a sali despues di kuater dia i for di e momentu ei el a terorisá e doño via ret sosial. ‘El a post hopi kos negativo, kosnan ku kompletamente no ta kuadra ku bèrdat. Na un manera kasi diabóliko.  Pa kolmo tin hende ku tambe ta skibi kos negativo di mi ku no konos’é mi, i ku ami no  konos’é.’

Pa e doño e situashon a bira dimas i el a indiká na EXTRA ku e lo kuminsá traha un ‘dossier’ tokante esaki pa asina  por buska un abogado pa tuma pasonan legal kontra difamashon.

EXTRA mester remarka ku un di e stazjernan ta un hoben di apenas 18 aña ku ta bisa ku a pone afo siguiente dia mes i ku ta via via el a haña yudansa pa por a bai bek su destino. E otro un señora di mas edat ku ta bisa ku ta e doño di e alohamentu di animal ta esun ku ta keda busk’e.