WILLEMSTAD.- Korte di promé instansia ayera a trata un kaso di violashon seksual i sekuestro di kual dos ruman hòmber ta keda akusá di dje.
Ta trata di rumannan D.Z. (38) i M.Z (44).
Ambos ta keda akusá di a sekuestrá i violá un dama i lag’é kompletamente troumatisá. Ta trata di e eks pareha di e akusado D.Z. mes.
D.Z. ta keda akusá di a pusha e dama den outo i a bisa su ruman M.Z. pa kue e víktima tene duru patras pa e no bula fo’i outo.
Despues el a abuzá di dje seksualmente i maltrat’é ku moketa den su kabes.
Ambos akusado a presentá ayera pa responsabilisá nan mes pa nan akto.
Hues a kuminsá ku M.Z. Hues a relatá ku M.Z. a konta na polis ku e ku su ruman tabata den outo. Dado momento su ruman D.Z. a puntr’é si e tin gana di tene relashon ku su eks i ku e ta dun’é e oportunidat pa hasi esaki.
El a bèl e víktima na telefòn pa despues nan dos kore bai botika na St Rosa. Segun M.Z. el a mira su ruman ranka e víktima saka for di outo i push’é den nan vehíkulo. M.Z. a sigui bisa ku su ruman a bis’é pa e tene e víktima duru pa e no bula fo’i outo.
Despues nan a kore bai kas di e ruman D.Z. di kual e mester a guia e víktima ku tabata pia abou hiba paden.
Mas aleu hues a sigui relatá ku e dama a deklará ku M.Z. mester a tene e víktima riba kama i miéntras tantu su ruman D.Z. (ku ta eks di e dama), tabata viol’é, batié ku moketa den su kabes pa e para ketu i kometé aktonan seksual rònt su kurpa.
Segun e víktima mas aleu, despues ku D.Z. a kaba, el a yama su ruman i bis’é “dal bai kiko bo ta warda”.
Despues di tur e aktonan, e dama a haña un chèns di kore bai i a yega na kas di un hende pa pidi yudansa.
M.Z. a bisa na Reclassering ku e no a hasi nada, siendo na sikólogo el a bisa ku el a faya i ku nunka promé e no a violá niun hende.
El a bisa ku e tabata bou di influensia di koka i ku e tabata hopi nèrvioso.
Ayera e akusado a splika ku e víktima a hasi tur kos boluntariamente. El a bisa ku e víktima tabata mustra drogá i tabata pió ku e mes ku ta usa koka.
Pa loke ta trata e akusado D.Z. el a splika ku niun ora so e no a violá e dama.
E akusado ayera a kuminsá grita den sala i bisa ku kon e por violá un dama ku e tabatin un relashon di 9 aña kuné.
El a splika ku el a konosé e dama via un amigu di dje despues ku nan a kaba di " gangbang" e dama.
Segun D.Z. el a konos’é e dama asin’ei, pues ku gusta tene relashon ku mas hende hòmber.
D.Z. a sigui grita bisa ku e ku e dama tin relashon ainda i ku tur kos a bai via su propio boluntat.
Fiskal Dennaoui-Simon den su rekisitorio a duna di konos’é ku si tabata di boluntat propio, pa kiko e dama ta akusá nan dos di e akto i dikon e mester a bai pidi ayudo na kas di bisiña ku paña kibra na su kurpa yorando i temblando.
Segun fiskal tabata kismentu pa wak ken ta tene relashon ku e dama promé.
Fiskal a duna di konosé ku e dama a deklará di a pèrdè su trabou despues di loke a pasa kuné, pa motibu ku e tabata keda sin bai traha hopi dia. Tambe el a pèrdè su apartamentu pa motibu ku e no por a paga mas i awor ta kedando serka hende.
Mirando tur esakinan e dama a hasi petishon di daño perhuisio di 8000 mil florin.
Fiskal despues di a trese su rekistorio dilanti a hasi un demanda di 4 aña pa M.Z. di kual 1 kondishonal i 8 aña pa D.Z. mirando ku na febrüari último el a kaba di sinta un kastigu di 5 aña pa un otro kaso di violashon ku el a kometé.
Hues den su desishon a bisa ku e ta kondená D.Z. na 6 aña mirando e prosedura di lei di korte den kasonan asin’aki i pa M.Z. el a bai di akuerdo ku e demanda di fiskal.