WILLEMSTAD.- Dos sobrebibiente dje lancha ku venezolanonan ku a noufragá na altura di Koraal Tabak, a entregá nan mes na polis.

Manera ta konosí djárason dia 10 yanüari, Kòrsou a keda di shòk ora a topa kurpa di 4 venezolano riba kosta na Koraal Tabak. A resultá ku e kuater kurpanan ta pertenesé na un grupo di aparentemente 39 hóben bou di 30 aña ku a sali for di Venezuela den lancha pa bin Kòrsou.

Yegando kosta nort, e ola grandi a bin dal e lancha i aki e tragedia a sosodé.

Tin indikashon ku hopi dje venezolanonan a bordo dje lancha a fayesé. Tambe tin indikashon ku algun a logra i subi tera.

Durante di wikènt 2 hòmber venezolano indokumentá a presentá na warda di polis i a entregá. E hòmbernan aki a indiká ku nan tambe tabata abordo di e lancha. I ku nan dos ta den e grupo di personanan ku a logra landa, yega tera i hui for di e sitio.

Outoridatnan mesora a detené e dos hòmbernan aki i a enkarselá nan pendiente investigashon relashoná ku e tragedia i pa despues deportá nan pa Venezuela, mirando ku tur dos ta indokumentá i a drenta Kòrsou di un forma ilegal.