UPDATE: Polis a informá awe mèrdia ku e dos hòmber detené despues di kibra den Optica Kywi na Fokkerweg ta: L.A.B. di 33 aña di edat i T.A.R. di 36 aña di edat, ámbos nasé na Kòrsou.

WILLEMSTAD – Un robo na Optica Kywi durante anochi a resultá den un operashon polisial grandi. Polis a logra di detené dos hòmber sospechoso i rekuperá un kantidat di brel ku aparentemente a keda hòrtá for di e negoshi. E kantidat di grandi di polis riba kaya a yuda resolvé e kaso aki di ladronisia den un ratu.

Segun informashon ku EXTRA a risibí, e malechornan a logra di drenta den Optica Kywi for di parti patras di e edifisio. Pa logra esaki, nan aparentemente a hasi uso di dos pata di kabra pa kibra i habri un entrada.

Despues ku alarma a aktivá, personal di seguridat di Curaçao Surveillance Services (CSS) a yega na e sitio. Via di e sistema di kámara di seguridat, nan a logra di mira kon e sospechosonan a sali for di e edifisio i a hui den direkshon di Lindberghweg.

E informashon aki a yuda polisnan pa sigui e ruta di e malechornan. Segun e informashon risibí, e sospechosonan a sigui via Lindberghweg, despues a pasa Kaminda Saliña i a sigui den direkshon di Kleermakersweg.

Durante nan huida, e sospechosonan a laga diferente artíkulo atras. Den un kurá di kas na Lindberghweg, polis a lokalisá sakunan ku brel, hanskun, paña pa tapa kara i otro artíkulonan ku posiblemente a ser usá durante e robo.

E búskeda a sigui den e área, kaminda diferente unidat polisial a ser mobilisá. Finalmente, polis a logra di detené dos sospechoso. Un di e detenshonnan a tuma lugá den área di Kleermakersweg, miéntras ku e otro sospechoso a ser detené na un otro lokalidat.

Durante e investigashon polis a konfiská diferente saku ku brel, entre otro montura nan di markanan karu. Riba e fotonan ku EXTRA a risibí por mira e kantidat di brel ku polis a rekuperá, komo tambe e operashon di búskeda den e área.

Segun e informashon risibí, tin sospecho ku e kaso aki por tin relashon ku un otro robo ku a tuma lugá anteriormente na Briónweg. Sin embargo, te na e momentu aki no tin konfirmashon ofisial ku e mesun personanan ta envolví den tur dos kaso.

Polis ta kontinuá ku investigashon pa determiná e balor di e artíkulonan hòrtá, kon e robo a ser prepará i si tin mas persona envolví den e kaso.

\