UPDATE - Kuerpo Polisial Kòrsou awe mainta a hasi e promé detenshon den e kaso di asesinato ku a tuma lugá na Playa Jeremi. E sospechoso a keda detenido den bario di Steenrijk riba djarason 21 di òktober 2026. Djabièrnè 25 di sèptèmber 2026, un hòmber a keda tirá den su vehíkulo na Playa Jeremi i a fayese na e sitio.

WILLEMSTAD – Relashoná ku e ola di atrako ku ta asotando Kòrsou últimamente, polis ta trahando duru pa pone un paro na e kriminalidat aki. Esaki ta hasi nesesario pa polis realisá investigashonnan profundo i entradanan hudisial na diferente lugá rònt Kòrsou.

Awe den oranan di mardugá, dos diferente grupo di polis, huntu ku Tim di Atrako, a realisá dos entrada hudisial. Un a tuma lugá den bario di Steenrijk i e otro na Tera Kòrá, kaminda a logra detené un sospechoso na kada un di e sitionan.

E úniko tim ku tabata presente na tur dos entrada hudisial tabata Tim di Aresto, ku despues di terminá su trabou na Steenrijk a dirigí su mes pa Tera Kòrá.

Na Steenrijk, Tim di Aresto a drenta un kas i logra detené un persona ku ta keda sospechá di a kometé un di e atrakonan ku a tuma lugá últimamente. E persona ta e promé sospechoso ku polis a detené den e kaso di asesinato ku a tuma lugá na Playa Jeremi dia di 25 di sèptèmber.

Despues di e detenshon, Tim di Transporte a tuma e sospechoso over i transport'é pa Warda di Polis na Rio Canario. Despues di esaki, Tim di Atrako a sigui ku su investigashon den e kas.

EXTRA a logra yega despues na Tera Kòrá, mas spesífiko den Kaya Basalt, kaminda tabata tumando lugá otro entrada hudisial relashoná ku kasonan di atrako.

Na e sitio aki, Tim di Aresto a rondoná e kas i despues a logra detené un hòmber ku ta keda sospechá den e investigashon. Tim di Transporte a tuma e sospechoso over pa transport'é.

TFO tambe a presentá na e sitio pa asistí den e investigashon. Normalmente, presensia di e tim aki por ta relashoná ku búskeda di arma di kandela òf otro pruebanan forénsiko, pero te na e momento aki no por konfirmá si a haña algun arma durante e entrada hudisial.

Polis ta sigui ku su investigashonnan relashoná ku e diferente kasonan di atrako ku a tuma lugá últimamente na Kòrsou.