WILLEMSTAD.- Kaso Maximus tabata esun ku tabatin mas atenshon djaluna durante tratamentu den Hof.

George Jamaloodin  a apelá su sentensia di 28 aña pa motibu ku e ta para riba su inosensia.

El a akseptá ku el a malversá un kantidat di 450 mil florin den kaso Germanium. Pa loke ta tata  kaso Passaat el a  ninga di a yena belasting ku fecha robes i tambe a ninga redondamente ku e ta esun ku a laga mata Wiels relashoná ku kaso Maximus.

Durante tratamentu di e kaso hues van Gink a relatá na Jamaloodin ku su dos trahadónan a deklará  despues ku a polis a detené Nini, Jamaloodin  a pone preshon riba nan pa traha un karta di trabou pe.

Pero nan no kier a hasié pa motibu ku e loke Jamaloodin a pidié pa hasi, no tabata kuadra ku bèrdat. Jamaloodin a ninga kompletamente di a pone preshon riba su trahadónan. Segun Jamaloodin, ta su abogadonan a konseh’é pa pone riba un lista tur e motibunan dikon Nini lo tabata bin tantu asina serka dje.

Hues a puntra Jamaloodin dikon e trahadónan di dje lo mester gaña algu asin’ei den su kontra. Segun Jamaloodin  e úniko kos ku e por pensa ta pa nan lanta nan propio kompania mirando ku a kita algun pòst fo’i nan ku tabata di gran importansia.

El a bisa ku e tabatin un bon relashon ku e dos tahadónan  pero no sa dikon nan mester a gaña algu asin’ei riba dje.

Hues a bisa ku tur dos a  deklará ku promé ku e morto di Wiels, nan tabata mira Nini tur dia na kantor, pero despues kasi no tabata mir’é mas.

E trahadónan a bisa mas aleu ku ora Nini a kai será, su ruman hòmber tabata konstantemente serka Jamaloodin na kantor i tabata sali ku ènvelòp di sèn. Jamaloodin a bisa ku e ruman hòmber a bin bèrdat pa buska trabou serka dje.

Hues a bisa Jamaloodin ku esei ta imposibel paso e dia ku el a bisa e esei, e ruman no a yega Kòrsou ainda.

Hues a bisa ku polis a tap  telefònnan i por a skucha kombersashonnan di e tata i e ruman hòmber di Nini kaminda nan a papia ku e ruman di Nini a keda kla ku  e kos.

Hues a bisa ku polis ta sospechá ku a bai tuma sèn serka Jamaloodin pa paga abogado pa Nini. Jamaloodin na su turno a bisa ku eseinan no ta bèrdat.