...dr. Gerstenbluth huntu ku minister Camelia-Römer...

WILLEMSTAD.- Tin un skarsedat di “hand sanitizer” i tambe “mondkapjes” na Kòrsou relashoná ku e Coronavirus, esaki ta loke ku dr. Izzy Gerstenbluth, epidemiólogo a duna di konosé ayera den rueda di prensa.
Minister Susanne Camelia-Römer, Minister di Salubridat Públiko, Medio Ambiente i Naturalesa primeramente a duna di konosé ku riba indikashon di nan tim di komunikashon ku tur djaweps pa un eksperto papia riba desaroyo di Coronavirus. Tambe tur djaluna ta kuminsá saka un komunikado pa duna un status di e vírus aki.
Dr. Gerstenbluth a trese dilanti ku el a nota ku tin un skarsedat di “hand sanitizer”. Dr. Gerstenbluth a rekordá ku e mensahe prinsipal ta laba man frekuentemente ku habon i awa. Ora no tin awa i habon e “sanitizer” ku mester kontené 70% di alkohòl. Den pasado dòkter a yega di bisa 60% di alkohòl tambe ta bon.
Tambe tin petishon pa botikanan, supermerkadonan i tokonan, pa no bende stòk grandi di produktonan ku un solo hende. Kòrda riba kompatriotanan ku tambe tin mester.
Tambe tin skarsedat di “mondkapjes”. A bisa ku e “mondkapjes” nan no ta yuda den kombatimentu dje vírus. Ta mira ku tin un kompra pisá di e “mondkapje” nan. E loke ku por hasi ta tene distansia di 2 meter for di un hende ku ta malu, nister i tosa. Kòrda riba higiena, tapa “bo” tos i nister. Ora mantené 2 meter di distansia, e vírus ta pasa via di gota i no ta bai mas largu ku 2 meter. Si tene distansia tambe ta un medio di protekshon. E mondkapjes ku ta sòru pa e vírus no pasa esei mundialmente tin skarsedat di dje. E paisnan ku ta produsí esakinan tin prohibishon di eksportá esakinan. Aki na Kòrsou tin sufisiente, pero tin di atendé ku nan aki di forma efektivo. Tin petishon pa por haña mas, pero no sa ki dia nan ta yega.
E numbernan di telefòn ku a duna promé tin problema pa lokalisá i haña informashon di e vírùs. E numbernan ku mester usa ta: 4322850, 851 òf 855 ora di trabou so.
Dr. Gerstenbluth a papia tambe di un kaso ku a bisa hende tin Coronavirus na un toko chines na Tera Kora. Dr. Gerstenbluth a yama esaki un “were were”. A bisa ku e hende nashonalidat chines ta kana ku masker na kara. Hopi hende a bira loko, a spanta. A averiguá na e toko. En bèrdat tin un hende ku a yega resien for di China. Pero e hende aki no ta malu, e mes no ta bin trabou i a disidí pa keda kas den karentena. Ta desishon di e hende aki, i pa dr. Gerstenbluth no tin mester. Pasobra e malesa no ta pasa di hende pa hende. Dr. Gerstenbluth a bisa di a averiguá esaki serka un di nos tòp ekspertonan ku ta Bayron Martina. Dia a deskubrí coronavirus sars, te a deskubrié e tempu ei. El a verifiká un biaha mas di e momentu ku por pasa e malesa pa otro. E kontesta ta ku nèt promé ku haña e vírus por pasa esaki den konsentrashon masha abou, pero gran mayoria eksperto ta bisa ora bo ta malu ta traspasá e vírus. Hasta si bo a bin di pais ku tin e vírus, bo no ta malu, bo no tin e vírus. Na Tera Kora no tabatin nada.
Loke tambe ta un molèster ta ku hendenan ta yama e numbernan di telefònnan di informashon i djis pa wak si tin hende ta kue e telefòn i chèk si nan tei òf nan ta traha.