WILLEMSTAD.- Kòrsou a mira hopi mas kasonan di COVID-19 den e último periodo. Segun dr. Izzy Gerstenbluth pa e motibu te ainda ta keda importante pa tur hende na Kòrsou ta tene nan mes na e reglanan básiko. ‘Ku ta: tene distansia, laba bo man i evitá agrupashon. Pero tambe: ora bo ta malu, no bai trabou, pero bai bo dòkter. Por general: si bo tin síntoma, keda na kas. Si bo ta den karentena, sigui e reglanan. I banda di esaki: bai vakuná.’
Gerstenbluth tambe a papia tokante e maneho di gobièrnu. Manera ta konosí gobièrnu ta hasi tur kos posibel ku mundu di farándula por sigui drai. Ku ta nifiká ku bar, snèk, klup di nokturno i ‘beach klup’ ta keda habri bou di sierto reglanan i kondishonnan.
Pero segun Gerstenbluth esaki no ta nifiká ku tur hende tin ku sali. ‘No tin niun obligashon pa sali. Ta bo desishon. Bo por keda kas trankil. No ta ku pasobra tin fiesta, bo tin ku bai fiesta.’ Gerstenbluth a splika ku segun gobièrnu ta importante pa no sera mundu di farándula. Komo konsekuensia tin sierto reglanan i kondishonnan. Gerstenbluth, huntu ku otro miembro di tim di krísis, a splika e reglanan na tur hende enbolbí. ‘Pero esaki no ta nifiká ku hende ta obligá pa Sali. Bo por keda kas tambe.’
Segun Gerstenbluth tin reglanan hopi estrikto pa mundu di farándula. ‘Si doñonan di klup no ta tene nan mes na e reglanan situashon por bira peligroso i e vírus por plama. Esaki a tuma lugá kaba na Kòrsou. Nos tabatin ‘superspread event’. P’esei nos a bin ku e seshonnan ku doñonan di klup, diskotèk, ets. Pa splika e reglanan hopi kla.’ For di wikènt pasa tambe tabatin kontrol pa wak si tur hende ta tene nan mes na regla.