WILLEMSTAD.- Segun epidemiólogo Izzy Gerstenbluth situashon di vakunashon na Kòrsou no ta hopi otro for di otro paisnan. ‘Na hopi pais bo ta mira ku e kantidat di hende ku ta vakuná na promé instansia ta basta haltu. Pero na un dado momentu e ta bira ménos.’ Gerstenbluth a bisa ku si bo wak situashon na Israel, ku ta e pais ku a ranka sali mas ku tur otro pais. ‘Si bo wak bon nan tambe a yega 60 òf 70 porshento di vakunashon.’

Segun Gerstenbluth nan no a yega 90 òf 100 porshento ainda. ‘Mi tin miedu ku nos lo mira esaki den tur pais. Na un dado momentu e kantidat di hende ku ta vakuná ta bira ménos. I komo konsekuensia nos tin ku kambia nos strategia. Si bo mira ku e kantidat ku ta registrá ta bahando – mi kier men ku e kantidat ta subi, pero e no ta ta subi manera den kuminsamentu.’ Segun Gerstenbluth nos tin ku pensa kiko nos por hasi èkstra pa hende por bin registrá. E epidemiólogo a splika ku tin diferente empresa ku ta bisa ku bou di nan personal tin hende ku te ainda no a vakuná. ‘Tin hende ku ta duda, ku tin pregunta. Por ta un idea ku nos ta bai na e empresa i papia ku e hende. Kita miedu òf duda afó. Esaki ta un posibilidat ku nos por hasi.’
Segun Gerstenbluth ta ainda ta trahando sita ku diferente empresa. Pero tambe tin e idea pa bai bario. ‘Nos ta bai serka di hende. Esaki ta un ehèmpel di otro kos ku nos por hasi pa aserká hende pa vakuná. Tin diferente idea, tin diferente strategia pa tòg purba yega na un kantidat mas haltu di hende ku ta vakuná.’ Banda di esei Gerstenbluth ta splika ku tempu tambe ta un instrumento. Awor tin hende ku ta ‘kijk de kat uit de boom’. Pero na final nan ta bin pa vakuná. Pasobra tin un grupo ku ta warda, pero na un dado momentu nan ta disidí tòg pa bin pa vakuná. ‘Kier men nos no a kaba ainda. Pero loke nos ta mira na Kòrsou no ta masha otro ku otro paisnan.’