WILLEMSTAD. - Mirando e kantidat di tèstnan pa dia i e kasonan di infekshon ku ta keda hopi abou, ta duna un indikashon pa loke ta trata e situashon lokal ‘kisas’, koutelosamente bisá, Kòrsou lo a yega su inmunidat kolektivo, ounke ta prematuro pa bisa, esaki ta loke ku dr. Jerry Semper a splika EXTRA den un komentario formulá.  Dr. Semper a splika ku mester indiká ku linianan di “World Health Organization” (WHO), ta bisa ku pa yega inmunidat kolektivo di un pais ta ora ku 85% di poblashon ta vakuná. Den e kaso di Kòrsou, na e momentunan aki 72% di e poblashon adulto ta vakuná.  Esaki ta indiká ku segun linianan di WHO, Kòrsou no a yega inmunidat kolektivo, dr. Semper a añadí.

E echo ku e kantidat di infekshonnan pa dia ku ta keda abou, ta un bon señal dr. Semper a bisa. No por ekskluí e posibilidat ku e echo ku 72% di adultonan ku ta bin na remarke pa vakuná a haña sikiera nan promé vakuna, ta reflehá den e sifranan.

E desaroyo positivo ta ku poblashon di Kòrsou ta sigui vakuná, ounke poko poko, pero kada granito ta yuda. Si tuma na konsiderashon ku Kòrsou tin na e momentunan aki 88.688 persona vakuná igual ku 72%, ta krea e speransa ku Kòrsou lo yega na inmunidat kolektivo ku ta 85%. Den e kaso aki 85% ta mas o ménos 105.000 hende adulto vakuná. Pues falta mas o ménos algu mas ku 16.000 hende pa vakuná. Na total Kòrsou tin 125.000 adulto ku ta bin na remarke pa vakuná.

Mester indiká ku te ainda niun pais na mundu no a yega 85% di su poblashon vakuná, pa motibu ku semper tin 20 pa 25% di hende ku no ke vakuná.

Ayera Kòrsou a registrá  7 kaso positivo di kua 6 tabata kasonan importá di hungadónan beisbòl ku a bin for di Cuba. Pues solamente 1 kaso ta lokal, despues di 1.530 tèst realisá

Tin 25 kaso aktivo i ayera 6 persona a sali for di isolashon. Te ku ayera tin 5 persona hospitalisá di kua 1 ta den kuido intensivo.

Finalmente dr. Semper ta enfatisá ku e echo ku tin 72% di poblashon ku a vakuná ta reflehá den e sifranan abou di infekshon.