WILLEMSTAD.- No tin muchu espasio pa ningun hende hasi eskoho entre e vakunanan di Pfizer i Moderna, esei pa motibu ku loke tin reservá di Pfizer ta práktikamente pa e grupo ku ainda tin di haña e di dos angua, miéntras ku for di djadumingu awor lo kuminsá ku atministrashon dje vakuna Moderna. Esei por a komprondé for di splikashon di dr. Jerry Semper e siman aki den un enkuentro ku prensa. T’asina ku EXTRA a puntra dr. Semper si pa un hende su propio trankilidat e lo por skohe for di un dje dos markanan di vakuna.

Dr. Semper a splika ku, a base di konteo e tim di vakunashon sa ku te ku djadumingu awor nan por usa Pfizer, pasobra sobrá ta reservá pa esnan ku tin di haña un di dos angua.

El a sigui bisa ku, tin di komprondé ku ne momentunan aki tin skarsedat di vakuna na henter mundu. No ta ke Hulanda no ke, sino ta por no por. E kantidat di vakuna ku Kòrsou tin mester no tin sufisiente di dje na Pfizer so, i ta p’esei a opta pa Moderna tambe. I pa por logra e meta di vakuná tur hende mas lihé posibel, mester opta pa pasa over na otro marka. Pues un hende no por skohe pa ningun vakuna, sino e tin di risibí esun ku tin disponibel al momento.

Segun dr. Semper, ta simplemente ora e kantidat ku tin disponibel di Pfizer, kual lo ta bandi djaluna asina, lo kuminsá  ku Moderna. Pues tur hende ku ta bai tin nan promé angua for di djaluna lo bira Moderna. E por sigurá ku lo no tin diferensia, por konfia den su palabra ku e efektonan di Moderna lo ta igual ku esun di Pfizer.