WILLEMSTAD, P’BURG.- “Si mi no a vakuna, mi ta sigur ku mi lo no a sobreviví esaki”. Na palabra, periodista Dick Drayer na St Maarten, despues di a keda trasladá via helikòpter medio for di Statia. Dos dia promé el a tèst positivo pa COVID19, na su yegada riba e isla, kla pa hasi un reportahe. E ironia ta ku el a bin e isla netamente pa reportá riba Covid i su chèns pa un posibel brote.
Ironia ta ku e ta e promé víktima di Statia, ku a pone ku mesora a aktivá e krísis tim, pasobra ta spera mas kaso awor.
Dick Drayer
Pa loke ta Dick Drayer mes, inisialmente e tabata trankil pasobra esaki lo a bai bon, pensando ku e ta protehá debí ku e la vakuna dos biaha. Sinembargo durante kurso di dia kos a empeorá i el a bira mas malu. Problema ku rosea tabata un di e hopi aspektonan, fuera ku e tabata sinti un grip pisa. Ya anochi kos a bira problemátiko unda ku el a haña problema respiratorio. Djasabra mainta trempan e tim médiko a reuní i a opta pa traslad’é pa St Maarten pa hasi mas tèst, inkluyendo un CT scan. Dick Drayer ta diabétiko pues no kier a tuma ningun riesgo ya ku e ta kai den e ‘grupo di riesgo’. Rumor ku un pulmon ya no ta traha, no ta kompletamente korekto. “Nan ta investigando ainda i kier evitá un long emboli’. Esaki ta un pròp di sanger ku por yega na e kurason i rementá kousando morto.
“Si no ta pasobra mi tabata vakuna, mi lo no a sobreviví esaki sigur” Dick ta bisa. E ta mustra na pashèntnan rònt di dje ku tin Covid19 pero ku no a vakuna, i ku nan situashon komo tal ta muchu mas problemátiko. E tin tur speransa si ku e lo sali for di episodio aki den un forma positivo. Mes momento el a sugirí pa tur hende sigui vakuna, pasobra esaki ta mehora bo chènsnan grandemente di sobreviví e malesa aki, sigur si bo ta kai den e grupo di persona ku rísiko.

Dick Drayer na momentu ku e ta keda trasladá di Statia pa St. Maarten