WILLEMSTAD.- Ta hopi reakshon mes EXTRA a haña despues ku abitantenan a sali i papia di nan malkontentu i desapunto ku ilegalidat ku tereno ku djis pasó un invershon a tuma lugá riba dje a keda hasí legal.

E abitantenan na promé lugá a bisa EXTRA ku nan ta sumamente desapuntá ku minister enkargá ku ROP i tambe ku e kuater ministernan ku a bai di akuerdo ku e akto bergonsoso aki.

Nan no por komprondé i no ke ni pensa ku minister Römer tambe lo a duna su aprobashon pasobra ta netamente tempu e tabata enkargá ku e servisio ei di gobièrnu a duna enkargo pa basha kas di un famia abou pasobra e konstrukshon a tuma lugá riba tereno hòrtá.

E habitantenan a splika ku den e kaso ei tabata un famia ku a keda desampará pero nan a gosa ku e gobièrnu a bisa di no ta aseptá nada ilegal.

I p’esei awor nan no por komprondé ku ta aseptá algu ilegal di un persona estranhero ku ta kue tereno, invertí algu (no miónes) riba dje i di dje si ta bira legal.

Nan no por komprondé kon hefe di ROP ta manda karta bisa ku e konstrukshon mester para pasobra e ta ilegal i tòg e minister enkargá lo a duna aprobashon pa sigui konstruí.

E abitantenan ta eksihí pa drei bèk e akto ilegal ei. Nan ke nan trankilidat bèk, nan ke nan bista riba kaya bèk i mas ku tur kos nan ke pa tene kuenta ku aki ta kasnan monumental kaminda e promé polisnan a biba. Banda di esei e negoshi ei ta nèt riba un skina ku ta hasi e situashon tambe peligroso pa tráfiko.

E akto aki ta un bèrgwensa nashonal pa un gabinete ku ta pretendé di ta mas santu ku papa di Roma i ku a bisa bon kla di no ta aseptá nada ilegal, asina e abitantenan a terminá bisando, enfatisando ku nan akshon ta kontinuá pa e kaso aki yega ministerio públiko.