Giselle Mc William

Minister di desaroyo ekonómiko

 

2019 ta tras di porta miéntras ku 2020 a kaba di kuminsá. Ku positivismo nos ta sigui padilanti minister enkargá ku asuntunan ekonómiko Giselle Mc William a bisa na Djasabra. Ounke djis algun luna komo minister el a habri bastante kaba i den 2020 por spera muchu mas.

Konektividat...

“E promé área ku mi a focus riba dje ta konektividat. Purba konektá Kòrsou mas tantu posibel i esaki ta mara na turismo o tambe na komersio. Nan tur ta kai bou di mi i den kuadro di atraé un liña aéreo ku ta bula entre Kòrsou i Miami i konektividat tambe entre Kòrsou i Santo Domingo pa loke ta karga. Ta konekshonnan sumamente importante ku mester bira katalisadó pa otro konekshonnan pa konektá Kòrsou den su totalidat pa komersio i turismo. Tambe hopi importante pa ami komo sosial demókrata e kos di mas bunita ku mi a hasi ta lansa e kampaña di konsientisá konsumidónan. Nèt ora mi a sinta a bini e ahuste di 6 pa 9 % OB i den e kuadro ei e úniko kos ku nos por hasi ta ku no tin preis máksimo, tin makutu básiko si, pero no por bisa e komersiante kua preis por bende pero loke si por hasi ta kada dos siman intensifiká komparashon di preis di e diferente supermerkadonan i publiká esakinan”, Minister Mc William a bisa.

Minister a splika ku esaki pa nan komo gobièrnu por tin un bista kon di e situashon di preisnan pero tambe pa e konsumidó haña un bista unda nan tin di kumpra, kiko nan tin di kumpra i unda nan no tin di bai. I huntu ku fundashon pa konsumidó gobièrnu a drenta barionan kaminda nan tabatin diferente tayer di trabou di kon atendé ku presupuesto personal. Pa e minister ta dos kos sumamente importante ku el a lansa i e lo keda enfoká riba dje pa e konsumidó sa unda e por kumpra i na mes momentu e ta aportá na nos ekonomia.

Hopi pa entrepeneurship....

Den kuadro di entrepeneurship tambe minister Mc William a splika Djasabra ku nan a hasi diferente kos. Nan a lanta un plataforma kaminda e diferente stakeholdernan ku tin di aber ku entrepeneurship a djòin manera KVK, Korpodeko, Qredicts etc., i kaminda tin un wèpsait ku  e futuro entrepeneurnan por subi i wak kiko tur tin mester pa lansa nan negoshi. Tambe nan por bai na MEO kaminda ta duna sosten pa e empresario por traha su plan di negoshi i mustra nan e kaminda ku nan por kaba. Entrepeneurship ta hopi importante i e sosten pa negoshi chikí i mediano pa minister ta un liña kòrá den ekonomia. I mester enfoká riba esaki pasobra ta nan ta kurason di ekonomia, ta nan ta empleá mas hende i ta aportá direktamente den ekonomia, sin kita atenshon di e proyektonan grandi pero manera tur ekonomista ta bisa, e parti di entrepeneurship chikí i mediano ta kurason di no ekonomia.

Minister riba Rolschats....

Giselle Mc William no tin ni un aña sintá i manera el a bisa, e ta riba “rolschats” tur dia. Esaki pasobra e realidat ta ku esei ta hende, tin un gabinete ku dos aña sintá i nan ke wak kos pasa. I esei el a pone pa su mes kiko ta e kosnan “low hanging fruits” ku nan ke i ku e por aportá, pasobra e no sa kuantu tempu e por sinta komo minister i ku e por aportá pa asina por mira bon kla ku e no a bai pa kenta niun stul  Giselle Mc William a bin pa traha. I esei el a bin ta demostrá.

Kòrsou independiente den WTO....

E ta satisfecho tambe ku resientementenan a bai Geneve kaminda a kuminsá e proseso ku Kòrsou lo bira miembro independiente di World Trade Organization. Esei ta nifiká ku Kòrsou lo forma parti huntu ku 160 pais na mundu ku ta bai papia e mesun lenga pa loke ta trata hasimentu di negoshi. Ta asina ku aktualmente Kòrsou tin algun bilateral firmá ku Colombia, Santo Domingo i próksimamente ku Trinidad i si Kòrsou forma parti di WTO e prosesonan aki ta bai muchu mas lihé. I Kòrsou ta wòrdu protehá den e proseso pasobra ora bai papia unu riba unu bo ta keda den desbentaha pero formando parti di un organisashon manera WTO i bo ta hasié ku un pais tambe den WTO, tin reglanan ku tur hende mester tene kuenta kuné i e bentaha ta ku e parti di e komersio entre paisnan ta bira mas fásil. Loke Kòrsou ke focus riba dje ta e parti pa eksportashon. Tin hopi produkto na Kòrsou i a identifiká 100 produkto kaba na Kòrsou i e próksimo paso ta buska e mihó 25 produktonan ku nan ta kere ku ta mas fásil pa eksportá sin lubidá e sobrá 75 pero na momentu ku pone e mihónan riba merkado ta trese mas oportunidat.

Turismo ta sigui krese....

I turismo sigur segun minister Mc William e ta kanando dilanti kuné. El a bisa den e  entrevista ku Djasabra ku e no ke pa turismo kana dilanti serka dje so pero pa tur hende. Pueblo di Kòrsou kompleto mester realisá ku turismo ta tangibel. Por  a mira atraves di añanan i último lunanan kon el a bin ta krese i e lo sigui krese den 2020. I meskos ku otro pais den Karibe i otro islanan den Mundu a skohe turismo komo nan sektor finansiero ekonómiko di mas importante, dikon aki no ta hasié. Aki tin tur rekisito i produkto pa hasié i e úniko kos ku falta ta pa nos kambia nos mentalidat i bisa ku turismo ta importante, importante pa duna servisio, importante pa e bishitante sintié na kas i nos por demostrá e bunita isla aki. Turismo ta e sektor kaminda direktamente e yu di tera ta haña trabou, turismo no ta solamente kamarera, waiter e ta sirbi pero e ta muchu mas. Netamente den e sektor aki dor di duna servisio i komprondé, bo ta krese masha lihé. “Kuantu hende nos a mira kuminsá komo waiter i kamarera a terminá den staf i asta GM di hotèlnan i asta ku nan mes negoshi den turismo. Tin asina tantu oportunidat aparte di hotèl, hospitalidat pero e parti di negoshinan di turismo. Tin asina tantu kaminda ku por krea oportunidat pa bo mes i bo famia den e sektor aki ku mi ta kere ta bale la pena nos pa tur yu di Kòrsou a haña oportunidat di haña nan pan di manera desente ku sodó i orguyo tambe”, minister Mc William a enfatisá.

Simplemente servisio....

E turista simplemente ke un bon servisio. Unda ku e bai, por ta trùk di pan mes, e ke un bon servisio. Si bo bai tènk bo ke bon servisio. Na supermerkado bo ke bon servisio. Bon servisio no ta pa turista so pero pa nos ku nos mes. Ora realisá esei nos lo ta aun mas un paraiso pa e turistanan ku ta buska un destinashon. Kòrsou ta den left pa loke ta turista krusero. A kaba di kibra rèkert di 3 aña konsekutivo di kantidat di turista, a pasa 800 mil i a yega 1.1 mion turista ku ta yega Kòrsou. Ta interesante pa menshoná ku e turista den Karibe hopi aña nos a lubidá di dje. I pro mira ku den Karibe tambe tin hopi potensial. I p’esei tin CTB ku ta enfoká riba e área aki i ta mirando su frutanan. Por mira turista den Karibe ta bishitá Kòrsou i ta turistanan ku ta bin bèk pasobra aki ta sinti nan mes na kas. I pa no papia mes di esun Oropeo ku ta sigui krese. No solamente Ulanda, pero Alemania, Noruega, Dinamarka, Bèlgika. Tin hopi potensial.

Hotèlnan den desaroyo...

Den 2019 e ministerio di desaroyo ekonómiko a hasi hopi esfuerso pa trese invershonistanan Kòrsou. Minister Mc William a kuminsá mira fruta di esakinan tambe.. El a bisa ku tin hopi proyekto ku a kuminsá den 2019 i awor aki ta bezig ta kristalisando. Proyektonan den kuadro turístiko, i invershonistanan di afó ta mir’é. Grandinan manera Corendon, Sta Martha, Hilton ku a bira Dreams, tur ta invershonistanan ku ta kere den e produkto turístiko di Kòrsou. Yanüari aki lo mira Marriott Courtyard kuminsá koba pa mira realmente, Howard Johnson ku a keda kumprá pa un pareha hóben ku ta bezig ta invirtiendo, Hotel Otrobanda kumprá pa hende lokal i ta bezig ta remodelá i ta parti di e invershon ku ta tu,mando lugá. Renaissance ku tambe a hasi invershonnan den remodelashon. Pa 2020 ora Corendon habri su porta lo ta un balor añadí pa e área di Otrobanda i Rif i e siguiente parti ku lo kuminsá tambe. Ta invershonnan grandi i yu di Kòrsou mester sa kon ta saka probecho di e desaroyonan aki.

Negoshi ta importante.....

 Den 2020 ta e ambiente di hasimentu di negoshi ta importante, e konfiansa. Ora ekonomia no ta riba su situashon di mas mihó por mir’é den komersio lokal, hendenan tin ménos konfiansa i esei awor aki e komo minister lo bai paga hopi atenshon kon ta trese esaki bèk dor di por fasilitá e komersiantenan mas mihó, i duna nan mihó servisio pa nan mira ku nos ta kere den nan i nos mester di nan. I pa krea e konfiansa bèk. Tambe algun proyekto importante huntu ku minister di finansa lo bai inisiá próksimamente ta insentivonan fiskal pa e hasimentu di negoshi na Kòrsou i hendenan ku hopi sèn pafó di Kòrsou pa laga nan bin Kòrsou ku nan sèn i mira si por duna nan sierto eksonerashon basta nan invertí nan sèn den proyektonan òf sektornan ku lo bai identifiká. Ta kosnan Out òf the Box ku nan ta bezig kuné. Minister a sigui bisa ku nan ta bai regional developing planning esta bin ku un universidat di Medellín a yuda pone Kòrsou den un ‘scoop’ i mira kada área kiko ta nos potensialnan i kaminda gobièrnu di Kòrsou tin di katalisá i kua kaminda ta lag’é pa e sektor privá pa huntu por sigui desaroyá. Kada área pa chikí ku Kòrsou ta, kada un di su mes balor i kos pa identifiká i asina por fortalesé esaki.

Mensahe....

“Pa ami e úniko kos ku mi ta pidi pueblo di Kòrsou ta konfiansa, e konfiansa den temporada no fásil tras di lomba pero ku 2020 gobièrnu huntu ku pueblo di Kòrsou nos por ta mas positivo. Ban surpasá tur opstákulo den nos kaminda pa nos por salbaguardiá e kos di mas importante ku ta Kòrsou, tantu pa Kòrsou mes i pa gobièrnu, al final gobièrnu ta Kòrsou i Kòrsou ta gobièrnu. Mi ta deseá pueblo di Kòrsou hopi bendishon, sabiduria i bai kuida otro pasobra al final nos tur ta ruman di otro di un manera òf otro”, tabata e mensahe final di minister Giselle Mc William.