WILLEMSTAD.- Ayera personal di Hitteam i Unidat di Mantenshon di Órden Públiko a  tene un kontròl general di tráfiko riba  Schottegatweg West. Ministerio Públiko tambe a kontrolá personanan ku no a kumpli ku nan pago di but.

E kontròlnan a tuma lugá entre nueb’or di mainta pa mitar di un di mèrdia.

E unidatnan a kontrolá 165 vehíkulo i a partí  un total di 62  prosèsverbal pa e siguiente infrakshonnan:   Manehá un vehíkulo sin: Reibeweis bálido, seguro bálido, karchi di kùr, impuesto pagá, plachi di number, glas skur, uso di telefòn selular bou di stür,     sin faha di seguridat.

Na tur a resultá ku 19 outomobilista tabata tin but habrí.

Ministerio Públiko a kobra na tur 695 florin i a drenta ku vários un areglo di pago.

7 shofùr a paga nan but kompletu òf parti di esaki, miéntras ku a palabrá ku e sobrá ku nan tin ku mèldu e siman aki na ofisina di Paga Bo But na Waaigat pa regla nan but habrí i pa evitá problema ora topa nan atrobe durante un kontrol di tráfiko.

Mayoria di esnan ku but habrí tabata tin esaki debí ku nan tabata tin un areglo di pago aktual, pero no a sigui kumpli ku esaki.