WILLEMSTAD.- Personal di prisòn ayera a konfiská droga riba un detenido miéntras ku pafó di prisòn, djis den serkania polis a detené dos hóben ku un drone i droga ainda pegá na e drone aki.

Ku regularidat personal di prisòn SDKK ta tene kontròl riba detenidonan i tambe den nan sèl. Esaki a sosodé ayera ora e personal di Sentro di Detenshon i Korekshon Kòrsou (SDKK) durante un kontròl a bin haña un detenido ku droga den su poder.

Mesora a konfiská e droganan akí i a start un investigashon na e sitio pa determiná kon e droga a yega serka e detenido.

Mas aleu den oranan mas atardi ayera polis a bai djis den serkania di Prisòn, riba un seru kaminda a tuma nota di un drone ta bula. E drone djaleu por a mira ku e tabatin un saku pegá na dje. Polis a bai e direkshon kaminda a tuma nota di e droga i a dal den dos hòmber ku tabata move den un vèn na e sitio. Tambe a haña e droga i ainda saku ku droga den dje pegá na e droga.

Algun siman pasá outoridatnan a detené algun hòmber ku tambe ta ser sospechá di tabata benta droga den prisòn hasiendo uso di drone.

Personal di prisòn ta dil ku e situashon aki ku regularidat. E maneho pa ku drone ta ku no por bula riba prisòn pero ainda esaki ta sosodé. Ayera sinembargo a logra pone man riba dos hòmber mas, sospechá di ta esnan ku tabata bula e drone ku ainda e droga pegá na dje. E drone miéntras tantu a kai den mondi, kaminda polis a bai pikié.