Segun minister Gijsbertha mester kobra a base di faktura

WILLEMSTAD.- Ultimo tempu hopi pasahero ku ta yega Kòrsou for di entre otro paisnan europeo òf Merka ta sumamente rabiá despues ku nan kaba pasa duana.

Aparentemente duana ta habri praktikamente tur maleta di e pasaheronan ku yega Kòrsou i si topa por ehèmpel pañanan di marka òf artíkulonan kostoso ta kobra e personanan un montante supstansial di sèn. Segun e pasaheronan, no ta mustra kon ta yega na e montante i tampoko ta duna splikashon.

Den un kombersashon ku EXTRA tabatin ku un pasahero ku resientemente a yega fo’i Europa, el a bisa ku den su maleta tabatin un kantidat di pañanan di marka  ku el a bin kuné, pero tur tabata usá kaba, pues sin etikèt.

E duana ku a habri e maleta a nota esaki i sin puntra pa faktura a bisa e pasahero ku nan mester paga 4 mil florin.

A surgi un diskushon entre e pasahero i duana pa motibu ku e ta splika nan ku e pañanan no ta nobo i ku e ta haña esaki ta abuzo i ku e montante ku nan ta kobr’é ta hopi haltu. El a bisa ku ta manera pará ta tira i kobra hende sèn.

Despues ku el a para riba ku e no ta paga e montante di 4 mil florin, e duana a baha e preis te na 400 florin.

Resientemente algun pelotero profeshonal a yega Kòrsou kual un di nan tabatin un wega di “playstiation” e lastu modèl den su maleta i mesora ku duana a mira esaki, nan a bis’é ku e tin ku paga mil dòler.

Esaki sigur e pelotero no a tuma i a para riba ku no por kobr’é e montante ei.

E ora ei e duana a baha e preis te na 180 florin pa e por pasa ku wega ku ya tabata usá. Pasaheronan ta bisa ku nan ta hopi desapuntá ku e sistema aki i si ta asina nan lo no bin Kòrsou mas.

Relashoná ku e echo aki, EXTRA mes ora a drenta den kontakto ku e minister konserní ku ta sr. Kenneth Gijsbertha  i el a bisa ku e tin ku buska mas informashon di e asuntu aki, promé ku  duna su kontesta.

Segun Gijsbertha echo ta ku mester kobra e pasahero riba balor di faktura.

Pero aparentemente esaki no ta sosodé manera mester ta.