No ta pa motibu ku 10 biaha a bai bon e biaha aki tambe por

WILLEMSTAD.- Un disputa ku riba un base regular ta surgi entre di importadornan i duana, pa loke ta trata preisnan di faktura ku mester kalkulá impuesto. Hopi biaha e importador ta bin ku un faktura di tal preis ku el a paga, pero si duana no ta konfia e preis, t’asina ku a base di lei ku ta regla tarifa di impuesto esta artíkulonan 18 i 19 insiso 1, ta duna duana e outoridat pa nan mes stipulá un preis ku ta rasonabel.

Den e kaso spesífiko aki, ta trata di un disputa kaminda ku un persona a importá un outo. Tin indikashon ku e persona ta un importadó di outo for di Merka i tur biaha e ta bin ku su faktura di sierto preis ku el a kumpra e outo na entre otro findishi i tur kos ta bai bon. E biaha aki duana no a bai di akuerdo ku e suma ku e outo lo a keda kumprá na Merka i duana a stipulá su preis ku na nan opinion ta rasonabel.

Ta trata di un Nissan Versa ku e importador a bisa ku el a kumpra pa 2.800 dòler, pero ku na opinion di duana e mínimo ku e persona aki lo a paga pa e outo ta 3.200 dòler. Mester indiká ku ora ta paga impuesto, ta paga esaki riba e gastunan total, esta ta bin aserka, gastunan di fleta, gastunan di dokumento, gastunan di transporte lokal i riba e sumanan total aki, duana ta kobra un tarifa di 27% na impuesto i 9% na OB.

Den e kaso aki e importador mester a paga 3.893 florin.

Esaki e importador tabata kontra di dje i a entamá un kaso hudisial pa e no mester paga e suma aki.

Manera ya menshoná, lei ta duna duana e outoridat pa e por kalkulá e preis i esaki nan ta hasié a base di un indikashon ku nan ta usa pa yega na e preis pa outonan di tal aña i tal kategoria.

Duana e bisa tambe ku no ta pa motibu ku e importador aki na vários okashon ta importá for di e mesun bendedó na Merka ku tur tur biaha a bai bon, e biaha aki nan ta kere ku e preis no ta basá riba realidat.

Esaki a pone ku despues ku Korte a evaluá tur e aspektonan di e kaso a bai di akuerdo ku duana pa kobra e tarifa di impuesto manera ku duana a stipulá.

E importador tin dos luna pa e apelá e kaso aki. E semèster a paga 700 florin na gastu di e proseso tambe.