WILLEMSTAD.- Duana ta bisa di a tuma nota di un publikashon ku a sali djaluna último den korant, kaminda ta asentuá ku Duana lo a kobra hende sèn di mas na momentu ku nan a drenta ku artíkulo ku a kumpra den eksterior. Duana ta bisa ku nan no sa reakshoná fásil riba kosnan ku sali den prensa pero den e kaso aki, debí ku e organisashon ta un ku ta respetá su mes, i ta funshoná konforme lei, lo no por permití pa krea e impreshon ku ta “wild wild west” tin na aeropuerto tin na aeropuerto.
Duana Kòrsou su “core business” ta pa kobra e impuesto korespondiente riba tur merkansia ku wòrdu importá. Esaki ku eksepshon di esnan ku tin eksonerashon di impuesto.
Tur pasahero ku drenta Kòrsou via di aeropuerto, tin ku paga impuesto riba merkansianan (nobo) ku nan kier drenta Kòrsou kuné. Ta konosí komo pasahero ta haña eksonerashon di impuesto riba merkansia te na un balor di 200 florin. Asina ku e balor di merkansia (nan) surpasá e suma aki, e pasahero konserní tin ku paga impuesto.
E kontròlnan di duana na sala di yegada na aeropuerto ta wòrdu dirigí via di e asina yama “maneho di riesgo”. Basa riba profilnan, e buelonan di riesgo ta wòrdu selektá. Pasaheronan ta wòrdu kontrolá komo tal i semper teniendo kuenta ku esnan lokal, turista, hendenan di edat i desabilitá.
Duana ta eksperensia ku apesar ku ta repartí foyeto pa pasaheronan ora nan ta saliendo pa entre otro Merka den e temporada di “black Friday, Thanks Giving”, etc., tòg tin pasahero ku ta regresá Kòrsou bek i ta trata di burla di e kontrolnan di duana. Nan ta hasi esaki dor di p’e kita etikètnan for di produktonan i pañanan nobo ku nan kumpra bini kuné i tambe argumentá ku nan no tin e respektivo faktura huntu ku nan. tur esakinan pa despistá duana i pa no paga impuesto di importashon. Segun nos leinan, faktura no ta e úniko medio òf base pa kobra impuesto di importashon.
Artíkulo 17, LVTI ta duna duana otro opshonnan pa yega na e balor dje merkansia kual despues lo sirbi komo e base riba kual duana ta kobra impuesto di importashon. Atrobe..., esaki ta pa por kobra impuesto di importashon na momentu ku no tin òf no por usa un faktura. E desaroyo digital aktual ta fasilitá e proseso pa por yega na informashon kual lo yuda pa yega na un balor akseptabel.
Duana ta sigui bisa ku no ta tur ora nan tin oportunidat pa splika detayadamente kon a yega na e balor, pero ta bon pa enfatisá ku primeramente ta e pasahero ta responsabel pa tin tur faktura i otro prueba nan legal huntu kuné, p’asina e por deklará su merkansia ku el a trese.
Nan ta hasi esfuerso pa e kontròlnan bai “smooth” p’asina evitá tardansa i stagnashon pa otro pasahero no mester keda para den reinan largu warda nan turno pa wòrdu kontrolá.
Duana Kòrsou ta ehersé su trabou a base di respektivo leinan i ordenansa, anto esaki ta sosodé sin hasi niun klase di distinshon di persona. Esaki ta nifiká ku ora un pelotero yu di Kòrsou ta hunga den liga mayor yega Kòrsou ku merkansia ku ta surpasá e montante pa kual e por a haña eksonerashon, e tambe tin di paga impuesto normal.
“Nos leinan ta duna tur persona e oportunidat pa entrega opheshon ora nan no ta di akuerdo ku e desishon ku duana a tuma. Duana su tareanan ta pa kobra impuesto di importashon i tambe tei pa protehá salubridat di nos komunidat”, duana terminá.