WILLEMSTAD.-Duaneronan a disidí ku ta pone trabou abou, pasenshi a kaba. Manera por a komprondé e trahadónan tin hopi asuntu pendiente pero no ta tende di nan dirigentenan polítiko kon leu ta pa atendé ku e asuntunan aki. Un grupo di trahadó huntu ku algun sindikalista a bai ofisina prinsipal di duana na Punda.

Un di e puntonan prinsipal ta posishon hurídiko di un grupo di trahadó. Mester duna sierto kompensashon (toelage) na e trahadónan. No tin klaridat riba situashon i futuro di e duaneronan ku awor aki ta siguiendo kurso. Ta bin aserka ku minister di finansa a instalá un komishon pa atendé ku posishon hurídiko di trahadónan di duana pero no a permití representashon sindikal den e komishon.

Trahadónan no ta hañando informashon kiko ta pasando.

Tin indikashon ku algun hefe den kuerpo di duana ke stroba otronan di sigui krese den e organisashon. Tin sindikalista asta a mustra dede den direkshon di e hefe interino di duana pa indiká ku e lo no tin grep riba esnan ku ta siguié.

Pasenshi a kaba pues si pa mayan djabièrnè nan no tende konkretamente unda e asuntunan ta wantá anto por spera ku tur kos por sosodé. Mayan despues di 11’or por spera desaroyo.

Minister di finansa sr. Silvania ta den eksterior pero riba su página di Facebook el a indiká ku el a duna enkargo pa atendé asuntunan di duaneronan pendiente ku urgensia. Mas detaye den edishon di EXTRA.