WILLEMSTAD.- Eks presidente di parlamento pa partido PNP, Dudley Lucia lo bira miembro i alabes e próksimo presidente di direktiva di banko pa desaroyo, Korpodeko. E puesto di presidente tabata vakante for di aprel 2023 despues ku Shurmel Elias a baha.

Den un karta fechá 21 di desèmber 2023 gobièrnu ta informá konsehero di corporate governance, SBTNO ku Lucia ta kumpli ku e eksigensianan mará na e funshon di un mènedjer general i alabes presidente. Lucia tin eksperensia den maneho, gobièrnu ta bisa den su karta i ta mustra ku e tabata direktor interino di Landsloterij kaminda ku e tabata enkargá ku e proseso di reorganisashon.

Alabes ta indiká ku Lucia pa 18 aña tabata miembro di parlamento di kua el a fungi 6 aña komo presidente. Tambe ta bisa ku Lucia tin eksperensia den funshonnan kaminda el a duna guia. E tabata 5 aña largu hefe di di departamento di tarifa na departamento di asuntunan ekonómiko i 1 aña largu sekretario di estado di Hustisia.

Mas aleu gobièrnu den su motivashon ta trese dilanti ku Lucia a fungi 4 aña largu komo konsehero di maneho na Servisio di Asuntunan Ekonómiko i 6 aña komo konsehero na Ministerio di Desaroyo Ekonómiko riba tereno di relashonnan ekonómiko di eksterior. Tumando tur esakinan na konsiderashon gobièrnu ta yega na e konklushon ku Lucia tin tur e kompetensianan ku un mènedjer i presidente mester tin.

SBTNO a base di e motivashon aki ta bisa di no tin opheshon kontra Lucia su nombramentu. Sí e konsehero di corporate governance ta para ketu na un proseso transparente pa atkerí miembronan di hunta di komisario ku mester tuma lugá. E ta urgi gobièrnu pa konforme artíkulo 4.2 di e kódigo corporate governance lanta un entidat ku ta enkargá ku selektá nombra komisario i gerente di kompanianan di gobièrnu.

“Miéntras no lanta e entidat aki i selekshon i nombramentu di kandidatonan pa funshonnan di komisario no por tuma lugá di un forma transparente”. Finalmente SBTNO ta konsehá pa mas lihé ku ta posibel modernisá statutonan di Korpodeko konforme statutonan modelo pa fundashonnan di gobièrnu.

E direktiva di Korpodeko ta konsistí di 15 persona. Gobièrnu ta nombra 5 di e miembronan miéntras ku sektor komersial i sindikatonan ta nombra 4 miembro. Asosashon di koperativa i asosashon di industria kada un ta nombra 1 miembro.

Thirza Lourens komo eksperto hurídiko i Randolph Gijsbertha komo eksperto di rekurso humano ta nombrá pa gobièrnu di e direktiva. E otro 3 puestonan tabata vakante i awor pues a nombra Lucia. Sektor komersial ta representá pa John Jacobs, Billy Jonckheer, Angelique Janga i Gabriel Magdalena.

Sindikatonan tin komo miembro den e direktiva Alcides Cova, Wendell Muelen i Humphrey Mongen. E di kuater puesto ta vakante. Pa asosashon di koperativa Astrid Carolina-Richardson ta representá den e direktiva miéntras ku e asosashon di industria no tin un representante nombrá na e momentonan aki.