WILLEMSTAD.- Por konkluí ku tabatin hasimentu di wega den mandamentu dje karta ku Sekretario di Estado Raymond Knops a formulá pa lidernan polítiko Gilmar Pisas i sra. Ruthmilda Larmonie-Cecilia. Esei pa motibu ku sra. Larmonie-Cecilia mes te awe no a haña e karta ei ofisial den su man. El a risibí un kopia dje karta via di e-mail di e Representashon di Hulanda stashoná aki na Kòrsou.

Durante un enkuentro, ku prensa konvoká ayera sra. Larmonie-Cecilia a deklará ku na momentu ku e karta aki a Sali den publisidat, a pone asina tantu interpretashon rondó dje karta ku a krea un konfushon kompleto. El a splika ku e kòmbersashonnan ku sr. Knops tabata orientativo i no a hasi ningun kompromiso. No tabata por tampoko pa motibu ku nan a akudí den kalidat di lidernan polítiko. Mester a warda e proseso di formashon terminá. E dos partidonan a trese nan vishonnan dilanti i a keda di pone esakinan den un dokumento.

Na momentu ku a bini un di dos enkuentro a informá e delegashon di Knops ku partidonan ku ta bai forma e siguiente gobièrnu lo ke renegoshá e COHO, kual ta konosí pa Hulanda. Es mas, e órgano di supervishon lo por ta IMF en bes di COHO òf CFT. Pero a keda di bini bèk riba e posishon ei ya ku partidonan no ta riba e mesun liña.

E último karta ku a bin sali den publisidat ta unu ku no a yega den su man, segun sra. Larmonie-Cecilia. Ta otro hende a inform’é dje karta aki, kual el a haña kopia di dje serka Representashon di Hulanda.

E lider polítiko a reafirmá ku e karta ku el a tuma nota di dje i ku tabata dirigí pa nan dos no tabatin un tono apropiá. Pero echo ta si ku nan lo kontestá e karta, aunke na a preferá di no divulgá detayenan di e karta aki.

For di esaki segun e lider polítiko por nota ku tin forsanan ageno ku ta determiná pa sembra sintimentunan di malkontentu, ansha i temor den komunidat. Si realmente nos ta biba den un pais demokrátiko, tin di rekonosé ku mayoria di pueblo a disidí den ki direkshon e ke bai, anto mester duna e próksimo gobièrnu un oportunidat.

Pero te awor no por hasi muchu mas di loke a hasi pa motibu ku tin di warda riba e proseso di ‘screening’ bini kla pa asina yega na formashon. I na momentu ku tin un gobièrnu por papia di kosnan ofisial.