WILLEMSTAD.- E COVID a pusha pa kambia sistema di enseñansa. Mester adaptá na mundu i awor ta bon oportunidat. SITEK a yega di trese dilanti kaba pa kambia kontenido di enseñansa i no mester tene miedu. Meskos ku Mulo a kambia pa Mavo i Havo i despues a kambia pa VSBO i SBO i meskos tabatin BLO i awor skol spesial i por adaptá awor aki atrobe.

Presidente di SITEK Lio Plantijn ta haña ku ta masha normal ku situashon ta pidi pa kambia i kontrali na añanan anterior, Kòrsou tin hopi akseso na Internet i ta nifiká ku mester ban balansá ku tur e lèsnan, materianan ku tin si nan ta nesesario ainda.

E ta kere ku sea por baha e kantidat di ora di nan òf eliminá nan òf kombiná tambe. I asta por krea materianan nobo tambe, tur kos dependé kiko mundu eifó ta eksigí. Otro bentaha ta ku ta bin un gobièrnu nobo i ta spera ku nan ta hinka den nan programa pa 2025 pa kambia e enseñansa di Kòrsou. I asina ta kana den un direkshon bai.

Plantijn a bisa ku tur hende sa kon importante enseñansa ta i porfin gobièrnu públikamente a pronunsiá ku trahadó den enseñansa su funshon ta vital. E ta hopi importante pa pais. Ta nifiká ku awor mester duna e trahadó den enseñansa e balor di bèrdat ku e meresé, rekonosé i dun'é rèspèt pa e por sigui ku e ánimo ku e tin.

I p’esei Lio Plantijn ta sinti doló ora e tende hende bisa ku e trahadó den enseñansa no ke trata. SITEK ta rechasá e kos ei kategorikamente.

Si wak último 5 añanan ku SITEK a wèlga, por a tende testimonio di trahadónan ku ta usa nan propio sèn pa kumpra kos pa e muchanan, unifòrm, tas, material pa skol, fèrf nan lokal, kumpra kortina i hopi mas.

Loke mester hasi ta sòru pa e trahadónan den enseñansa ta den ambiente ku nan bida, salu i nan seguridat ta garantisá. Lio Plantijn ta kòrda ku el a siña esei for di na Akademia Pedagógiko. Kaminda bo ta funshoná bo bida, salú i seguridat mester ta garantisá pa bo mente por funshoná. I esaki sigur ta konta pa e maestro i dosentenan.