WILLEMSTAD.- Pandemia di COVID-19 a pone un spil den nos kara. El a trese retonan entre otro den e sektor di enseñansa. E dunamentu di lès ‘online’ no ta e problema, pero e problema ta loke e studiante mester manera Internèt i kòmpiuter pa por sigui e lèsnan ‘online’. Rector Magnificus di University of Curaçao (UoC) Francis de Lanoy ta kompartí e pensamentu aki.

Den entrevista ku EXTRA dr. Francis de Lanoy a mustra riba e reto, ku nan tambe tin nan dilanti ya pa un aña kaba. E ta un reto pa nan tur i en partikular na momentu ku aña pasá e enseñansa a kambia di un dia pa otro, pa unu kompleto ‘online’.

Den kaso di UoC for di 2016 nan a kuminsá ku enseñansa ‘online’ kaminda ta parti e programanan parsialmente ‘online’ i otro parti ku e studiante presente. Esaki teniendo na kuenta ku e tendensia den enseñansa avansá ta ‘online’.

Pero segun dr. de Lanoy, un di e kosnan ku nan a supestimá, ta e echo ku no ta tur studiante tin un ‘device’ na kas. Tin hende ta bisa ku por a prepará mihó, pero den kaso di UoC ora nan tabata duna e lèsnan ‘online’, e studiante por a bin ku su kòmpiuter i peg’é den sierto sala ku nan tin òf tambe nan mes na UoC tabatin kòmpiuter ku e studiante por a hasi uso di dje pa e sigui su lèsnan ‘online’.

Pero na momentu ku e situashon a kambia i ku e lèsnan mester a keda siguí kompleto ‘online’ i na kas; un kas kaminda tin bia no tin Internèt, no tin sufisiente ‘device’, no tin koriente, esei tabata e reto ku nan a supestimá.

Rector a bisa ku nan a bringa durante di aña pa e studiantenan por ekipá nan mes pero e ta keda un reto.

Awor aki e ta bayendo mihó pero no optimal. No ta tur kas di famia tin Internèt, no ta tur kas tin diferente ‘device’. Por imaginá un situashon ku na un kas ku dos ‘device’ miéntras mama i tata tin di traha for di kas, ruman tin di sigui skol ‘online’; e planifikashon kon ta usa e ‘device’ na kas i e komunikashon ta hopi importante. I esei ta un reto segun dr. de Lanoy.

Pa loke ta e plataforma, e parti didáktiko el a bisa ku no ta un problema, pasobra nan hende ta prepará pa traha kuné. Ta e studiante su aksesibilidat na Internèt i pa haña e mashin ora e tin mester di dje pa traha kuné, esei ta e reto.