WILLEMSTAD.- Komunidat di Kòrsou ta den temporada druk di fin di aña, dianan di fiesta i tambe komienso di un aña nobo sigi pa temporada di Karnaval.
Na hopi okashon, nos bida tambe ta bira mas druk I ta varios preparashon ta tumá luga.
Esaki ta bon momentu pa Brandweer Kòrsou hasi komunidat konsiente tambe, ku promé ku bo sali kas, ta importante pa saka bo artefaktonan elektroniko for di koriente pa asina evitá kasonan lamentabel.
No opstante durante di e dianan druk aki, trafiko na Kòrsou tambe ta subi konsiderabel, kual ta duna difikultat pa vehikulonan di emergensia por hasi nan trabou debidamente.
Den kuadro di esaki, Brandweer Kòrsou a traha un spot/video di konsientisashon pa “Duna Vehikulo di Emergensia,Preferensia!”.
Brandweer Kòrsou atrabes di e video aki ta konsientisá komunidat, ku nos trabou pa sirbi komunidat si ta keda durante di e dianan aki.
Ultimo tempu nos a tuma nota di un komportashon di komunidat, na unda no tur outomobilista ta duna vehikulo di emergensia e preferensia nesesario.
Brandweer Kòrsou por ta bayendo pa duna kualkier tipo di asistensia, sea un kas na kandela, un reskate di persona òf animal, òf por ta bayendo pa duna asistensia den kualkier tipo di situashon. Esaki ta hasi importante, pa nos por yega e lugá mas pronto posibel pa por duna asistensia na e situashon.
Ban duna vehikulonan di Brandweer, Polis, Ambulance e preferensia na momentu ku abo komo bon siudadano tuma nota di esaki, pa nos por sirbi nos komunidat mas mihó.
Komunidat mester ta muchu mas konsienté ku yudansa na e persona ku tin mester di esaki ta di gran balor I nifikashon, komo bon siudadano, duna bo aporte.