WILLEMSTAD.- Korte di promé instansia ayera a posponé un kaso di kual dos hòmber ta keda akusá pa mas di 10 ladronisia den bibienda.
Ta trata di e hòmbernan W. Hodge ( 23) i H. Henriquez di apénas 20 aña.
Ambos ta keda akusá pa 10 kaso di kiebro i ladronisia den bibienda, kaminda nan a bai ku vários pertenensia di e víktimanan entre otro prendanan balioso.
Hues Edelenbos a splika ku ainda tin diferente investigashon andando. Mester skucha mas testigu i hasi investigashon na “pandhuis” kaminda a bende e prendanan.
Hues a hasi petishon pa rapòrt di Reclassering di ámbos akusado.
Durante un kaso pro forma, abogado Eustatius ku tin e defensa di Hodge, a remarká ku esun mes ku tabata duna òrdu pa kometé e robonan, ta den libertat miéntras su kliente ta será.
Fiskal a duna di konosé ku ta na lastu momento e akusadonan a bisa ku ta e hòmber Perez Cervera konosí pa hustisia tabata ordená nan pa kometé kiebro i ladronisia.
Hues a revelá ku Hodge a deklará ku ta Henriquez a duna nan e òrdu .
Hues a bisa tambe ku si bèrdat Perez Cervera ta e sospechoso prinsipal, investigashon lo determiná esaki.
Si ta asina lo manda Perez Cervera bèk prizòn.
Segun hues mas aleu, a detené e akusado T. Jansen tambe i a duna deklarashonnan basta inkriminatorio.
Abogado Eustatius na su turno a bisa, ku no tin nada di ladronisia probá, kontra su kliente Hodge, solamente tabatin hürmentu di outo i inkubrimentu kontra di dje.
Segun e abogado, Hodge su interesnan personal ta pisa mas, debí ku e tin un baby ta bai nase na yanüari próksimo.
Henriquez a bisa ku fo’i promé, el a deklará ku e no konos’é Perez Cervera.
Hues a bis’é ku e ta keda straño di tend’é bisa esei aworakí.
Hodge na su turno a splika ku e solamente a bai bende e oronan i hür outo.
Nan a pag’é e sèn pa e tin algu den su saku.
Hues a sigui bisa ku Hodge tabatin kombersashon ku Perez Cervera, kaminda polis por a skuch’é bisa pa bin pa kue algun kos.
Asina tabatin hopi kombersashon mas entre Hodge i Perez Cervera, segun hues.
Relashoná ku tur esakinan, hues ta haña ku tin sufisiente motibu pa tene e akusadonan será, mirando ku nan ta keda akusá di un seri ladronisia ku tabatin lunanan ta tuma lugá i ku ainda e investigashon andando.
Despues di e kaso anterior, na momento ku e akusadonan a bai patras ku e miembronan di LBD pa wòrdu trasladá pa prizòn, Henriquez sin bisa un pia palabra, a dal Hodge un moketa den su kara bentá abou.
Hodge a lanta bèk, pero a keda tambaliá. Mas den lat e mester a keda hibá poli pa motibu di e sla ku el a haña den su kara ku a kousa herida.
Ayera e kaso mester a keda tratá integralmente, pero debí na e medidanan di COVID a keda posponé pa un tempu indefiní.