WILLEMSTAD.- Hues a honra petishon di abogado nan Athena Sulvaran i mr Rooijer pa suspendé detenshon di e hòmbernan G. Migares (43) i G. Rosalia (40).
Ambos ta keda akusá di tabatin plantashon di 4463 mata di mariwana den e periodo di 9 òktober 2020 den área di Skèrpènè.
Tambe nan ta keda akusá pa ladronisia di koriente fo’i 15 febrüari 2020 te ku 9 òktober 2020 dor di kibra 4 kabel di koriente.
Den un kaso anterior fiskal Bos a para e tratamentu pa motibu ku den un otro kaso ku yama Cabaye, a drenta un informashon anónimo ku Migares ta den mas kos.
P’esei fiskal a posponé e kaso pa hasi mas investigashon. Ayera fiskal a bolbe pidi pa posponé e kaso te ku 4 ougùstùs.
Segun fiskal ta trata di un kaso ku a shòk komunidat mirando e akusashonnan. P’esei e ta pidi hues pa ninga e petishon pa suspendé nan detenshon.
Pa loke ta trata e ladronisia di elektrisidat, hues a splika e prosèsverbal di polis a duna di konosé ku e koriente tabata profeshonalmente hasí.
Migares a splika ku e tin nada di aber ku niun plantashon. El a duna Rosalia e tereno pero e no por a pensa ku e ta bai hasi e kosnan ei.
Segun Migares e tin ku bai Hulanda pa yuda mama di su yunan ku e muchanan. E ta kompletamente inosente.
Rosalia na su turno a splika ku Migares tabata bende koko i e no konosé den e kosnan aki.
E tabata bishit’é i tabata mira kon e tabata planta.
Asina el a haña smak pa e tambe planta.
Migares a bis’e ku e ta entreg’é e lugá pasó e ta bai Hulanda serka su yunan.
Segun Rosalia el a bai serka un hende i huntu nan a kuminsá ku plantashon di mariwana.
El a mira kon e parti di lus tabata prepará i a sigui ku e sistema.
Segun Rosalia, Migares tabata bin masha poko bia kaminda nan tabata. E tabata bai solamente kaminda tabatin berdura.
Abogado di Migares mr Athena Sulvaran a bisa ku ta di mas warda te ku 4 di ougùstùs pa trata e kaso.
El a splika ku na ougùstùs su kliente lo hasi 10 luna será sin ku e kaso keda tratá integralmente.
Banda di esaki e abogado a bisa ku aworakí detenshon preventivo ta hopi mas pisá debí na e medidanan di COVID i ku e detenido no por haña bishita. Segun e abogado mas aleu no ta e intenshon ku ta usa pre detenshon komo un sorto di adelanto riba kastigu, pero mester wak si ta rasonabel ku e hende tin tantu tempu den pre detenshon sin su kaso a wòrdu tratá.
Abogado Rooijer ku tin e defensa di Rosalia, tambe a usa kasi mesun ponensianan.
Mirando esakinan hues a bai kompletamente di akuerdo ku ámbos abogado i a posponé detenshon di e akusadonan. Tur dos por a bai kas.