WILLEMSTAD.- E hòmbernan D. ”Bubi” Nepumuceno (38), nasé na Kòrsou i J. Milliard (31) nasé na St. Eustatius, akusá pa vários kiebro i ladronisia den bibienda i tambe den e negoshi Cellular Point, den e periodo di 1 febrüari 2020 te ku 15 Sèptèmber 2020, a sali hopi di bon for di nan kaso.
Nan ta keda akusá di bai ku bastante joya karu, un kantidat grandi di kos luhoso manera oloshi, prenda, telefòn ku nan asesorionan, aparatonan elektróniko, hèrmènt, baiskel di marka “Redline”, pañanan di marka karu i vários kos mas.
Nepumuceno tabata den ròl stul, despues ku algun aña pasa, el a wòrdu bentá for di dos piso den prizòn i a insistí ku e no por hòrta den ròl stul.
Polis a haña un informashon anónimo, ku den un kas na Saonawèg “Bubi” tin vários kos hòrtá den su poder.
Polis ku a kore yega rápido na e adrès, a bai na e kas number 7 i a haña “Bubi” enbèrdat den e bibienda huntu ku 4 hòmber mas.
Den un kamber den e kas, polis a haña vários kos hòrtá.
E akusado a bisa ku e no ta biba na e number di e kas ei, pero e ta biba na kas number 5.
E otro akusado Milliard na su turno, a deklará ku e ta esun ku ta biba na kas number 7. El a splika, ku el a haña vários di e kosnan den mondi, pero tambe serka un amigu di dje di Brievengat, ku a keda likidá algun tempu pasá. Segun Milliard, Nepumceno sa bin na su kas ku su frei tin ora, pero no tabata sa nada di e kosnan ku polis a haña den e bibienda.
Ámbos akusado a ninga di a kometé e ladronisianan.
Fiskal a bisa, ku tin 6 denunsia di kiebro di ladronisia kontra e akusadonan, pero e úniko prueba ku e tin, ta e loke nan tin den e dosié.
Segun fiskal no a ked’e nada otro di duna ámbos akusado “vrijspraak” pa e kiebro i ladronisia. Fiskal ta haña ámbos kulpabel i kómplise pa inkubrimentu. Despues di tur esakinan, fiskal ta hasi demanda di 50 dia pa Nepumuceno, di kual 15 kondishonal.
Pa loke ta trata Milliard fiskal a hasi demanda di 50 dia di kual 17 kondishonal. Hues den su veredikto ayera a bai di akuerdo ku e demanda di fiskal di 50 dia di kual 15 kondishonal, pero ta desviá for di e demanda di Milliard i ta konden’é na 90 dia, di kual 73 kondishonal, ku un periodo di prueba di 3 aña, mas 100 ora di trabou pa komunidat.