4 luna promé nan a kaba di sali será:

WILLEMSTAD.- E duo M. Laken (29) i J. Adriana (29) a keda kondená ayera na 5 aña di prizòn pa atrako armá ku violensia.

Tur dos a kaba di sali fo’i será despues di a sinta un kastigu di 6 aña. Nan tabatin apénas 4 luna den libertat promé ku nan a bolbe kometé otro delito.

Ambos ta keda akusá pa atrako armá  i ladronisia dia 22 di ougùstùs i 2020 riba e víktima di fam Rog.

Segun e  akusashonnan a hòrta su IPhone i renchinan di orea oro.

Nan a hasi esaki dor di ranka tas i menas’é ku arma di kandela i bis’é den un tono hopi agresivo "Si bo no tin e sèn aworakí mi ta tira bu, laga mi wak den e tas ei, bo mester tin sèn".

Banda di esaki, nan a pusha e víktima patras di kas ku forsa i ranka loke nan e tabatin den su man.

Segun Adriana, Rog tabata debe nan 10 mil florin di un trùk di batido ku e kier a habri. Pero nan a kai será i no a tende nada mas.

Ora el a sali fo’i prizòn, e kier a topa Rog pa e kumind’é i dun’é un abraso despues di tantu aña. El a yama Rog pa nan topa na Mac Donalds, pero Rog a kore bin kas serka nan.

Despues di a sinta papia tokante di e debe, Rog a yega na un akuerdo pa paga 1000 florin te ora e kaba.

El a bisa ku e momento ei e tabatin solamente 600 florin huntu kuné i e lo bai bin bèk pa trese e sobrá.

Despues el a bisa nan e lo laga su telefòn keda komo bòrg i si e no keda kla, nan por bende su telefòn, pero a bai bin bèk ku e 1000 florin kompleto.

Siguiente dia el a bin bèk serka nan masha trankil pasó el a lubidá su reibeweis i a sinta papia ku nan, despues el a bai sin niun problema.

Segun Adriana, Rog asta a bai  den baul i kue un kèts nobo dun’é komo regalo.

Despues ku Rog a bai, reshèrshi ta yega na su kas i detené nan pa menasa ku arma.

Rog a deklará na polis ku su yu a haña un “voice” riba facebook di Adriana ku ta bisa “broer ma kaba di sali fo’i prizòn i mi ke topa bu, brasa bu.

El a bisa ku no ta kuadra ku e kier a lanta niun trùk di batido i no tabata debe nan 10 mil florin, sino 1000 florin.

Debí ku nan tabata será e no por a a paga nan.

El a bai Hulanda i despues ku el a regresá, el a haña e  mensahe.

El a bai kas di Adriana pa bis’é ku e no tin e sèn, euro so e tabatin i pa nan dun’é chèns pa sera e sèn.

Segun Rog, ora el a pita  “Bloki” ( ku ta Laken) a sali huntu ku Adriana.

El a kumindá, pero “Blòki” no a respondé.

Blòki a bai para su tras pa despues a saka un arma pone na su hep i bis’é pa e dun’é e sèn sino e lo mat’é.

El a bai bin bèk i a duna nan 600 florin pero nan no kier a tum’é. Nan a eksigié pa duna nan e 1000 florin kompleto.

El a bai na su tata i ku hopi esfuerso el a haña e 400 florin fia.

Despues el a bolbe bai hiba e sèn pa nan.

Ora el a yega duna nan e sèn, nan a bai kuné patras, pone pistol i ranka su tas fo’i dje.

Tur dos a tuma 500 florin di e sèn ku el a hiba pa nan.

Ora el a logra haña su tas el a ripará ku su telefòn no tabata aden.

El a reklamá su telefòn i Laken a bis’é ku su telefòn ta bon telefòn.

Despues Laken a bende e telefòn ku un persona ku a bis’é ku e no tabata sa ku tabata telefòn hòrtá.

Ora ku polis a detené e hòmbernan, nan a haña Laken ku un arma. El a atmití i a bisa ku e tabatin un arma bèrdat.

Na 2014 nan a kima 3 outo di dje i semper el a keda ku e trouma.

E akusadonan a ninga di a tira atrako riba e víktima.

E mener ku a kumpra e telefòn a bisa ku Laken a bis’é ku e telefòn tabata regalo di su frei.

Fiskal a haña e akusashonnan pa ámbos probá.

Na aña 2017 tur dos a keda sentensiá na 6 aña pa atrako. Nan a kaba di sali i tabatin apénas 4 luna liber ya kaba nan a bolbe kometé otro atrako.

Fiskal ta haña e akusashonnan kompletamente probá i ta hasi demanda di 8 aña pa kada un.

Hues den su desishon a haña e akusashon kompletamente probá a base di e deklarashonnan di e víktima pero a desviá for di e demanda di fiskal i a kondená ámbos na 5 aña.