WILLEMSTAD.- Korte di promé instansia ayera a trata e kaso di sekuestro di un studiante di India.

Ta trata di e kaso di sekuestro ku a tuma lugá dia 4 pa 5 di yanüari último, na momento ku 3 hòmber a sekuestrá e dama na bòrchi bùs na Seri Lora den oranan di anochi.

Pa ku esaki Ministerio Públiko ta akusá e hòmbernan Amal Sujalekshmi (20)  nasé na India,  Gideon Scorea i Gueseppe Best (24)  ámbos nasé na Kòrsou di a kometé e akto aki.

Ayera tur 3 a presentá den sala di korte pa responsabilisá nan mes pa nan akto.

Hues Edelenbos a relatá ku riba 4 di yanüari último, un melding a drenta na polis ku e dama a wòrdu sekuestrá.

Dia 5 di yanüari, e dama mes a presentá na warda di polis ku  su lep di kap i algun fraktura mas na su kurpa i a deklará kiko a pasa.

El a bisa ku e hòmbernan a  sekuestr’é, lastr’é hink’é den outo i a eksigié pago di 100 mil florin.

Dia 6 ku tabata siguiente dia  outoridatnan ku a traha riba e kaso rápidamente, a bai mesora en buska di e sekuestradornan i a detené nan pa responsabilisá nan  mes pa nan akto.

Na polis e víktima a konta ku  su amigu Amal tabata deb’é un sèn i mester a trese pe.

Amal a yam’é na telefòn i bis’é ku el a drenta konvoi pa bin baha na Seri Lora, pa e top’é pa dun’é su sèn.

Na momento ku el a bai para na e parada di bùs pa topa Amal, esaki no a yega i a disidí di bira bai bèk.

Ora ku e tabata kana bai el a mira un vehíkulo ku dos hòmber aden kara tapá ku a yega blòki’é, baha kue lastr’é i bent’é riba e stul patras  bai kuné.

El a kuminsá grita sapatiá pero e hòmbernan no a tene kuenta ku esaki.

Mas aleu e víktima a sigui konta, ku un di  e hòmbernan ku a resultá di tabata e akusado Best, a kue sunchié na su kara pa despues bent’é riba e stul patras.

Su kara i su man a wòrdu di tape. E por a tende ku ámbos hòmber  tabata papia bon papiamentu.

Nan a kore bai un apartamentu kuné na Mambo. Nan a pidié su telefòn i tambe su kódigo, pa asina por yama su mayornan na India i pidi sèn.  Segun e víktima, na momento ku e tabata den e kamber, el a lur wak pafó i a mira  tantu Scorea komo Best pará pafó banda di e outo ku nan a sekuestr’é.

Tambe el a mira Amal pará huntu ku nan pafó ta huma sigaria.  Segun e víktima, el a trata na kore bai, pero Best a mir’é i a  kue tene  lastr’é hink’é bèk den kamber.

Aki nan a benta un trùi shinishi riba su kabes tapa su kara hink’é den outo bèk i kore bai kuné na un otro apartamentu.

Best ta esun ku a keda kuné, miéntras Scorea a trese kuminda pe despues.

Segun e víktima, Best tabata huma mariwana henter dia  riba dje. Dado momento Best a pega soño i esei a pone ku el a haña chèns di sali kore bai. Aki el a topa un siudadano ku a para pe i hib’é polis.

Den promé instante Scorea a ninga di tabata sa di algu. Best si a bisa for di promé instante ku en bèrdat el a partisipá pa sekuestrá e  dama.  Segun Best, e no tabata sa nada di sekuestro. Amal ta esun ku a bis’é pa e sekuestrá e mucha muhé, sino algu lo pasa e i su famia.

Amal a mustr’é potrèt di su frei i tambe unda e ta  biba. Esaki a pone ku el a spanta i hasi loke Amal a bis’é.

Hues na su turno a bisa e akusado ku e ta floho di kere ku Amal por a pone preshon riba dje, mirando su estatura for di Amal.

Mas bien hues a bisa di ta kere ku Amal lo mester a ofresé sèn pa sekuestro di e damita.

Best a bisa ku e no tabata kier pa nada pasa e damita, mirando e plannan ku Amal tabatin.

El a bisa ku Amal tabata kier a droga e damita pa evitá ku e por rekonosé na su holó.

P’esei el a partisipá, pa purba protehá e damita. Hues na su turno a bisa e akusado ku si e kier a yuda e damita, e mester a bai polis.

El a pasa mas di 12 ora ku e damita  i tòg no a hasi nada pa yud’é.

Asta e damita a bisa ku Best a mare na su man , pa evitá ku e ta trata na hui. Best a bisa ku e tin duele di loke el a hasi i ta konsiente ku el a hasi algu robes. Pa loke ta trata e akusado Scorea, e tambe a bisa ku Amal  a pone preshon riba dje pa yuda den e sekuestro. Segun Scorea e tabatin problema un tempu  ku e paisanonan di Amal  i ku Amal  a probechá di e situashon i menas’é ku si e no yuda e lo mata su yunan i su frei.

Scorea a sigui bisa ku Amal konosé bou di e nòmber Saiko i debí ku e ta rep su kosnan Amal a pone preshon pa e kometé e echo.

Scorea a bisa ku Amal su amigunan ta “ugly” peligroso. El a bisa ku Amal a hür un outo pe kometé e echo aki, pa motibu ku e mes no kier a hasié ku su mes vehíkulo. Scorea tambe a bisa di tin duele di loke el a hasi.