Aña pasá a atendé 600 hende ku problema di pago

WILLEMSTAD.- Tur èks studiante ku tin debe di estudio na Dienst Uitvoering Onderwijs (DUO) lo tin un tremendo oportunidat dia 16 di mart próksimo pa deliberá ku e hendenan di DUO ku lo ta na Kòrsou. Funshonarionan di DUO lo tei pa papia ku èks studiantenan pasobra ketu bai tin hopi kaso di èks studiante ku ta den situashon hopi difísil. Esaki ta e momentu pa tur e èks studiantenan ku tin problema ku pago pa nan buska solushon.

Ya kaba DUO a tuma kontakto personal ku e diferente èks studiantenan via di un karta personal i òf email. A indiká ku tur esnan ku ta sinti e nesesidat i ke papia ku DUO por manda un email na debiteurenbeheer@duo.nl.

Tambe tur èks studiante di Kòrsou ku no a haña un invitashon di DUO, pero si ta sinti e nesesidat di papia ku e instansia riba nan debe di estudio, por manda un emial na debiteurenbeheer@duo.nl.

Aña pasá tambe DUO a dediká atenshon speshal na èks studiantenan i na e okashon ei a atendé no ménos ku 600 èks studiante na Kòrsou pa asina nan por a yega na un areglo i pago. Mas lat den aña representantenan di DUO lo bishita e otro islanan karibense di reino. Einan tambe lo bai papia ku èks studiantenan ku tin problema ku pagamentu bèk di nan debe di estudio. Meskos ku na Kòrsou lo tene kuenta ku sirkunstansianan persona pa yega na e mihó areglo.

Banda di esei ta asina ku tur hende ku ke haña informashon riba finansiamentu di estudio por akudí tur djarason i djabièrnè despues di mèrdia na Stichting Studiefinanciering Curaçao (SSC), pa papia ku un kolaboradó di DUO riba e punto aki. No mester traha sita.