WILLEMSTAD.- Korte di promé instansia, relashoná ku medidanan di COVID a bolbe posponé e kaso di ladronisia den e depósito di vürwèrk mihó konosí komo “Kruithuis” na Industriepark na Brievengat.
E ladronisia a tuma lugá dia 8 di novèmber 2020.
Pa ku e kaso aki, Ministerio Públiko ta akusá P. Christiaan (44) i H. Clothilda (31) di a kometé e akto den e periodo di 4 di novèmber te ku 8 di novèmber 2020.
Segun Ministerio Públiko, nan a kue un kantidat di 139 kaha di klapchi na balor di mas o ménos ANG 115.000,- mas 12 kaha na balor di ANG 10.620,- ku ta pertenesé na G. Semeleer.
Dia 8 di novèmber alrededor di sinku pa shete di mainta, Sentral di Polis a risibí informashon ku tabatin un kiebro na e depósito na Brievengat.
Djis un ratu despues a drenta un otro yamada, indikando ku den bisindario di un hòfi na Jongbloed, algun hòmber tabata sakando kahanan for di un vehíkulo i hinka den algun otro.
Polis a bai na e sitio, pero no a topa nada partikular.
Kontinuando ku nan investigashon, algun minüt despues polis a topa riba Gosieweg un di
e vehíkulonan ku ta kuadra ku e deskripshon ku un ratu promé Sentral di Polis a duna.
Despues di no a sigui òrdu di polis pa para, a kuminsá un persekushon tras di e vehíkulo aki i den Rancho e vèn a aksidentá.
E dos sospechosonan okupante a baha for di e vèn i trata na kore bai.
Pero polis a logra pone man riba ámbos akusado ku a resultá di tabata Christiaan i Clothilda.
Den e vèn, polis a haña un kantidat grandi di kahanan di vürwèrk, ku a keda konfiská.
For di investigashon na e depósito a resultá ku deskonosínan a kibra dos kandal i a bai ku un kantidat supstansial di kahanan di vürwèrk for di dos kònteiner.
Semeleer, a bisa ku ta trata di vürwèrknan di kategoria haltu ku ta wòrdu usá solamente pa shownan grandi.
Resientemente e kaso a keda presentá pero niun di dos di e akusadonan a presentá. Ambos a keda poné den libertat pendiente tratamentu di nan kaso.
Ayera e kaso un bia mas a keda posponé pa tempu indefiní.