WILLEMSTAD.- E tim ku ta atendiendo ku ladronisia di outo tin nan man yen ku kasonan ku ta keda bini aserka diariamente. E tim aki kasi riba un base diario ta haña nan konfrontá ku kasonan di robo di vehíkulo i/òf piesa ku ta tuma lugá na man di malechornan.

Kontinuando ku investigashonnan ayera reshèrshinan a bai na un adrès den De Savaan. E adrès aki ta konosí pa outoridatnan. Den pasado na mas ku 1 okashon a tene entrada hudisial i a realisá detenshon pa ladronisia di vehíkulo i piesa di vehíkulo.

Durante entrada hudisial ayera a haña un kantidat di partinan di diferente vehíkulo. Entre otro a haña diferente porta, bùmper di outo i tambe partinan di un “quad”. Relashoná ku esaki polis a bai ku un homber warda. E homber ta biba den un kasita ku tin riba e tereno aki.

Awor lo bai wak si e homber ta responsabel pa e piesanan hòrta òf si e por bisa ken ta esun òf esnan responsabel pa esaki.

Investigashon den e kasonan aki ta kontinua.