Den e próksimo 6 lunanan mester atendé Lista di prioridat

WILLEMSTAD. - Na opinion di Presidente di “Centraal Georganiseerd Overleg in Ambtenarenzaken” (CGOA) sr. Profesor Valdemar Marcha, ayera tabatin un evento históriko entre di sinku organisashon sindikal i representantenan di Gobièrnu. E reunion aki tabata nesesario pa logra yega na algun punto di salida, ku a keda stipulá den un lista di prioridat. E puntonan stipulá riba e lista aki lo keda atendé den e próksimo 6 lunanan, pa den luna di aprel 2020 posiblemente lo keda aseptá komo e maneho di personal di gobièrnu.

Marcha a enfoká riba e situashon difísil ku Kòrsou ta pasando aden i ku ta afektá e sektornan ekonómiko i finansiero. Konsekuensia di e situashon Gobièrnu ta konsiderando medidanan pa ku su trahadónan. P’esei e enkuentronan aki ta nesesario p’asina huntu diskutí e medidanan ku tin den tapara.

E organisashonnan sindikal, ABVO, SAP, STRAF, SITEK i NAPB huntu ta diskutí riba e interes general pa huntu yega na un posishon hurídiko di e trahadónan di gobièrnu.

Mirando e retonan na kaminda, gobièrnu a disidí pa den un seshon informal yega na dos punto di importansia, esta yega na un lista di prioridatnan i tambe un lista kon ta atendé ku e prioridatnan aki.

Marcha a splika ku e enkuentro tabata intenso, pero partidonan a logra yega na un akuerdo.

Marcha ta konsiderá esaki komo un logro importante i si tur hende mantené e puntonan di salida stipulá, partidonan lo sali viktorioso afó.