Roel Calister ta kosechando hopi éksito na Ulanda ku e banda Kuenta i Tambú. Loke a kuminsá komo un hòbi, awe Roel ta praktiká komo su trabou, esta músika/toka drùm. El a konta Djasabra ku e tabata toka drùm komo hòbi. Dado momentu su ruman muhé Izaline Calister a puntr’é si e no ke toka perkushon den su banda i mesora Roel a bai di akuerdo i sin problema. Loke a kuminsá komo perkushon a bira toka drùm. Roel a ripará einan e diferensia entre e i e otro músikonan ku ta mas desaroyá mas musikalmente kuné. Roel a disidí ku e ta bai studia muzik i a drenta konservatorio di Rotterdam. Roel a kuminsá studia i traha. E tabata traha den dia den un ofisina pa e por a studia. Nunka mas e no a haña duele di loke el a hasi.

15 aña den farándula

Roel tin 20 aña na Ulanda i tin 15 aña den farándula i pa 15 aña farándula ta su fuente di entrada. Roel ta bini di un famia musikal. Su mama ta kanta den kor, su ruman muhé Izaline Calister no tin mester di introdukshon, su tata gusta muzik, otro ruman hòmber tabata kanta den kor huntu ku otro ruman. Ta Roel so no a forma parti di niun kor. “Nos tur por ta bibando un bida di músiko pero al final ta ami ku Izaline so a sigui den dje”, asina Roel a konta Djasabra.

Siña kanta i toka

Roel a konta nos ku e sonrisa di semper riba su kara ku tempu e tabata den skol básiko el a bai partisipá na un festival di kanto i e kier a kanta “Mi alpargata” di Issoco. E tempu ei no tabata por i el a hañ’é obligá ta partisipá ku Bachata Rosa. Roel a gana i el a haña komo premio un Nintendo kual el a hunga solamente 2 biaha i e otro premio tabata un aña di lès di kanto na Muziek School. Na Muziek school el a siña kanta pero sin niun hende sa el a hinka su mes den e lès di drùm tambe. Roel a sòru pasa di banda, skep e lista di espera i kuminsá siña toka drùm. Asina el a kuminsá kanta i toka drùm. No tabata un kor ku ta duna presentashon.

Kuenta i Tambú

Kuenta i Tambú a nase asina aki: Roel ta konta ku e tabata kompañá un amigu di dje ku barí, kaminda e amigu tabata konta kuenta i Roel tabata toka instrumèntnan. Asina su amigu a dun'é e oportunidat pa den un festival chikí e hasi muzik di Kòrsou. E mester a forma un grupo i trese muzik di Kòrsou. E tempu ei Randel Rosalia, Marvin Snijders, Monica Moacheia nan a bin huntu. Roel ta konta ku el a hür instrumènt pa e muchanan toka. E doño di e teater a keda impreshoná i a bis’é ku na Ulanda niun hende ta hasié i e lo ta interesante. Asina Roel a bai graba algun kantika, el a traha su foyetonan i manda diferente teater. Na 2009 el a kuminsá ku 24 shou. Di einan nan a toka algun festival i tabata sigui impreshoná tur hende. Roel ta kòrda e kansion di Kalakuna ku ta hasi tur hende loko durante di nan presentashonnan. “hisa man, baha man, pone na kustia.......”. Despues di esei no a pasa ni un shou ku no a toka Kalakuna.

A kuminsá tokando instrumènt ku boka. E muzik rítmiko tabata algu nobo na Ulanda. A kuminsá hinka mas instrumènt den dje i invitashonnan a kuminsá bin. Nan a biaha pa Merka i ta tour Oropa kompleto.

“Tur hende hisa man”

E aseptashon ta algu inkreibel. Mayoria kantika ta na papiamentu. Den kada presentashon ta splika e kantidat i tambe ta splika durante di nan presentashonnan algu di Kòrsou mes. Por ehèmpel e ritmo di “tur hende hisa man” nan ta splik’é na kada presentashon i ounke e hende no ta komprondé, komo ya nan a splik’é, ora kanta “tur hende hisa man” ta tur man ta bai laira.

I mesun kos ta konta ora di “tur hende bula na laira”. Nan ta splika e hendenan i nan ta hasié. Tur hende ta bula na laira. Roel a bisa ku tin biaha ta un oudiensia di 300 hende pero tin biaha e ta asta 10 mil hende ku nan ta presentá pe. Ta meskos ku ora aki tende un kansion di por ehèmpel Kassav ku ta na franses, hopi no ta komprondé pero ta kant’e “uit volle borst”.

Konsientisá di ritmo i papiamentu

No solamente e kansion rítmiko di Kòrsou pero tambe Roel i Kuenta i Tambú ta presentá papiamentu na e públiko grandi. E echo ku ta papiamentu no mester ta un barera pa presentá e muzik di Kòrsou, asina Roel a enfatisá.

Kuenta i Tambú ta na Kòrsou ku regularidat. E aña aki nan tabat’ei den aprel. Den Kuenta i Tambú tin ulandes ta toka. I nan tin CD tambe grabá. Tin Tambutronik ta e  kombinashon di tambú i tronika. Aktualmente e último CD ta Raiz. Tabata un poko difísil pa Roel bisa kua di e kansionnan riba e CD aki ta su faborito. Despues ku nos a insistí el a skohe “sangura”. Roel ta kanta einan di tur e malesanan di por ehèmpel chikungunya, dengue etc., etc., i sangura ta bin ku e antidoto pa bo kura mesora. E ritmo ta keda di Kuenta i Tambú. E ta un ritmo tambutronik. E kansion ta alegre i ta zona duru i di mes úniko.

Biba di muzik

Roel nunka a tuma NO komo kontesta den nada ku el a hasi pero esei no ta nifiká ku el a hasi algu sin pensa. Semper el a sinta pensa kiko si por. Na su último aña na skol el a puntra su dosente kon e ta kombiná muzik ku bedrijfseconomie. E mener a bisé e tempu ei ku esei no por. Roel a bai Ulanda i el a bai kaminda el a studia, muzik. E ta produsí muzik i tin skol di drùm i nunka el a traha pa un doño di trabou i e ta posibel. Pero bo mester kere den bo mes, pensa, hasi investigashon di kiko por òf no, tuma rísikonan kalkulá i si kos bai malu kon skapa bo kurpa. BO mester di plan A, B i asta C i meskos ku kualke negoshi bo tin di traha ‘ridikulamente’ duru pa logr’é. Nunka lubidá loke bo tin na kas i afó bo ta kòrda kon dushi e muzik di kas ta i kon dushi kas ta. Tin hende tin suerte di biba na Kòrsou i hasi muzik biahando i otronan tin di biba afó. Si bo hasi bo bèst bo por biba di muzik. E ta mas bien biba di bo hòbi i no tin nada mas dushi ku biba di bo hòbi, asina Roel a bisa.