WILLEMSTAD.- E echo ku a surgi un insidente ayera kaminda 8 persona kasi lo mester a bai okupá kamanan na hospital, a surgi pa falta di duna importansia na e petishon di keda kas i sali solamente si ta realmente nesesario.

Esaki ta un petishon ku outoridatnan ta hasiendo ya pa 1 aña.

Si a resultá ku e 8 hendenan envolví den e insidente ayera mester a okupá kamanan na CMC, esaki ta nifiká ku lo tabatin 8 kama ménos pa pashèntnan di COVID-19. Hospital ta basta okupá i ta atendiendo solamente kasonan ekstremo, mirando ku e situashon di COVID-19 ta eksigiendo hopi espasio. Awor ta atendiendo asta pashèntnan for di Boneiru.

Aparte di esaki, na momentu ku e insidente a surgi, no tabatin ni 1 ambulans pa por duna promé asistensia, debí ku tur tabata okupá i segun nos informashonnan parse ku tabata relashoná ku kasonan di transporte di pashèntnan ku COVID-19.

Ta un boluntario di Krus Kòrá ku a duna tur e víktimanan promé asistensia pendiente di yegada di ambulansnan. Despues di basta ratu 3 ambulans a presentá na e sitio.

Un biaha mas e mesun apelashon; keda kas mas tantu posibel i sali solamente si ta realmente nesesario. Si bo ta riba kaya mes kore ku koutela i pone atenshon pa asina evitá kualke desgrasia.