WILLEMSTAD.- E sindikatonan APRI i PWFC ku ta representá e trahadónan i eks trahadónan di Refineria Isla a presentá un plan kaminda profeshonalnan yunan di Kòrsou mes, ku sosten di empresarionan lokal finansieramente fuerte i sólido, den un aliansa ku kompanianan internashonal di renombre, ta bai manehá i operá e refineria. Algun detaye di esaki a sali den publisidat kaba sinembargo e grupo formá pa negoshantenan lokal ku apoyo di esnan internashonal tin miedu ku lo bai para firme na modelonan di prosedura i struktura miéntras ku awor aki Kòrsou no tin e luho di tempu na su fabor.
Tin un grupo,manera indiká, lokal ku sosten amplio internashonal ku ta kla pa firma akuerdo i drenta refineria mesora. Tantu e sindikatonan komo kontratistanan di mas grandi di Kòrsou ta duna bendishon total na e grupo aki. Ta hopi trahadó tin na kas i e miedu ta grandi ku pa fin di e aña aki RdK un bia mas lo bolbe kana e ruta di manda algun shen trahadó kas. Gherrel Remilia presidente di APRI ta mustra EXTRA ku e situashon aki mester haña atenshon di nos mandatarionan i di hinter nos komunidat.
E grupo enkuestion a inskribí pa partisipá na e proseso ku Refineria di Kòrsou a start pa di tantísimo bia. Simplemente e grupo ke tuma e refineria over. Nan no tin nodi di bai hasi ‘due diligence’ pasobra ta profeshonalnan ku konosé e refineria kompletu. Nan a splika EXTRA ku promé ku e refineria bira operashonal tin 7 planta grandi, esnan di mas importante di e refineria, ku mester pasa den un proseso di mantenshon riguroso promé. Pa esei e grupo lokal ku su aliansa na e.o Brasil a pone 32 mion dòler disponibel kaba. Esaki ta enserá sufisiente plaka pa e 7 kontratistanan mas grandi drenta refineria ku tur nan personal i kuminsá mesora hasi mantenshon riguroso na e plantanan. Kada kontratista ta spesialisá den un área spesífiko, ku otro palabra lo tin trabou pa tur trahadó hopi lihé. E grupo lokal ku sosten ekstranhero tin mester di alrededor di 80% di eks trahadónan di refineria.
Nan a duna garantia pa pago di salario pa 6 luna, plùs ta den 90 dia mester pone tur trahadó bek na trabou pa e proseso di start up. Komo ku ta hendenan ku konosé e refineria nan ta kere ku asta lo tin mester di mas tantu trahadó. Mester pone hopi planta den kondishon optimal pa nan por funshoná una bes ku e refineria kuminsá operá.
E eks trahadónan di refineria i sigur esnan di kontratista ta na kas i nan situashon ta birando kada dia mas difísil. Pa e motibu ei nan ta sostené e opshon di e grupo lokal ku aliansa ekstranhero. E grupo a indiká ku nan ta duna garantia di suministro di krudo loke tambe ta un punto esensial. Pa demostrá ku ta trata di un asuntu serio a laga un persona di hopi kredibilidat lokal tuma kontakto ku premier Rhuggenaath pa mustra e interes serio i genuino di e grupo aki. Manera nan ta yama nan mes, Grupo Corc a splika EXTRA ku nan ta dispuesto pa pone montantenan grandi riba un “escrow account” pa asina Refineria di Kòrsou (RdK) por tin e seguridat ku ta atendiendo ku hende serio.
E grupo ta bogando pa no keda mará na prosedura i prosesonan largu. Nan ta bou di e impreshon ku e direktor interino di RdK Chonky de Lannoy komo un profeshonal di sertifikashon ISO ke kana prosesonan largu i den e situashon ku Kòrsou ta aktualmente no por bolbe bai kana e ruta ei. Ya kaba na dos okashon a sinta i mira sr. de Lannoy kana e trayekto di prosedura i na final tur kos a kaba na aros i koko ku tur e konsekuensianan pa e trahadónan. E grupo ta hasi apelashon na sr. de Lannoy i gobièrnu di Kòrsou den su totalidat pa mira interes di e pais aki, pasobra mas lihé refineria kuminsá drai mihó e ta pa hinter Kòrsou.
PMO i gobièrnu na dos okashon kaba a duna sr. de Lannoy e mandato pa buska operadó pa e refineria i esei no a logra. Tempu a sigui bai i ya kaba tin algun shen trahadó na kas. Spesialmente e trahadó di kontratista ku no a bai kas ku un pakete royal ta esnan ku ta den situashon sumamente penibel.