WILLEMSTAD.- E di 12 edishon di e akshon nashonal di limpiesa di mas grandi riba nos isla, World Clean Up Day Kòrsou tabata un éksito atrobe. Un akshon ku su meta ta pa keda konsientisá pa un isla mas limpi, ku e aña aki tabata 2 dia. Danki na tur e boluntarionan ku a registrá komo organisashon/kompania, individual i spònsernan ku a kontribuí pa e dia tabata un éksito atrobe. Djabièrnè 20 sèptèmber i djasabra 21 di sèptèmber a tuma lugá e di 7 'World Clean Up Day' 2024 i Kòrsou tambe a forma parti, huntu ku 191 pais mas, na e evento di boluntario di mas grandi na mundu. Fundashon Curaçao Clean Up ta hopi satisfecho kon e 2 maintanan di limpiesa a bai rònt Kòrsou for di Bándariba te Bándabou. Dos (2) dia ku hopi boluntario a kombertí den un evento sosial tantu di famia komo di trabou. Mas ku 2.500 super héroe a partisipá na e mainta di limpiesa na komo 78 lokashon den tur bario di Kòrsou. Ademas 75 sambuyadó super héroe di 17 skol di sambuyá a piki shushi den laman na 16 playa. Den transkurso di siman lo tin e kantidat di kilo definitivo.
E organisashon ta yama danki na e kantidat grandi di boluntario, for di mucha te ku hende grandi hopi motivá i ku hopi alegria i energia, e aña aki atrobe a hasi limpiesa tantu riba tera komo den laman. Tambe kordinadónan di área ku a hasi un tremendo trabou. Un danki tambe na komersio ku a respondé riba nan yamada. Tur otro instansia, bario, gruponan sosial i deportivo, skol i individualnan ku a partisipá ku hopi amor pa hasi nos isla mas limpi. Na Ministerio di GMN, Selikor, i tambe na tur kontratista di ekipo pisá ku a duna un tremendo kontribushon riba e dia aki atrobe, danki. Sin nan ayudo, e dia aki lo no tabata posibel. Fundashon Curaçao Clean Up, ta spera ku despues di 12 aña lo bin mas akshon i kontròl pa berdaderamente tur ku ta kontribuí, mira un kambio. Pa medio di un lei mester por konsientisá komunidat kompleto pa resiklá hopi mas, en bes di tira shushi for di outo òf den mondi. No mester prohibí so, mester keda konsientisá i kuminsá mira e balor di shushi tambe. Ban spera ku despues di djabièrnè i djasabra último, komunidat lo sa pa mantené Kòrsou limpi. Un isla limpi ta na bienestar di salú i ekonomia. Kòrsou ta di “nos” tur i ta “nos” tur tin ku mantené limpi i sigui tene e wowo habrí pa kada shushi ku ta mira rònt i sigui tuma akshon, huntu ku famia, bisiña o kolega. Ta huntu por logra esaki i sigui konsientisá otro pakiko mester biba riba un isla limpi.