WILLEMSTAD – E preparashonnan pa e di 19 edishon di Ride for the Roses ta den ‘full swing’. Djadumingu di 26 di yanüari awor hende di tur edat por partisipá atrobe na un kantidat di aktividat deportivo. E fundashon organisadó ta entusiasmá pa kompartí ku e públiko grandi algun aspekto nobo di e evento.

Walk & Run
Ya ta tradishon 7 or mainta Walk for the Roses ta kuminsá na Awasá. Promé ku esei pa 6:45 or tin un ‘warming up’. E partisipantenan por skohe entre 8.1 km pasando riba brùg Reina Juliana òf 5 km pasando riba brùg Reina Emma, tur dos finalisando na Mambo Blvd. Tin un kambio chikitu den e ruta di 8.1 km. Biniendo for e brùg haltu e ta lora na man drechi pa pasa na e edifisio di Fondo Prinsesa Wilhelmina na Scharlooweg ku un punto pa entrega di awa na altura di Corendon-The Ritz. Atraves di Kaya Otto Senior den direkshon di Waaigat e ruta di kustumber ta sigui via Pietermaai i Pèn te yega Mambo Blvd.

Algu nobo e aña aki ta e Run for the Roses ku ta kuminsá for un sekshon separá djis promé ku salida di e kareda di 5 km i di 8.1 km. Pa mucha (te 12 aña) tin un kareda di 2 km for di skol Chaya Willems, na final di Pèn, pa Mambo Blvd

Ride
E ruta pa e koredornan di baiskel di Ride for the Roses kasi no tin kambio. Easy Ride pa esnan mas hóben, bou di guia, ta sali for di Mambo Blvd pa sentro di siudat i bèk. Esei ta un ruta di alrededor 10 km. Ademas tin un ruta di 40 km i un di 60 km riba kaminda públiko ku bòrchi pa indiká kon sigui. Tur tres ruta di baiskel ta kuminsá banda di 8 or mainta na Mambo Blvd, ku ta fungi tambe komo punto final.

Swim
12 Or di mèrdia tin na Zanzibar Jan Thiel Swim for the Roses di 2.7km pa Wet & Wild na Mambo Blvd na kua tantu landadónan kompetetivo komo esnan di rekreashon por partisipá. Sinembargo, no ta sigui e reglemantu internashonal di FINA mas pa kompetensia den laman grandi. E aña aki tur landadó ta sali pareu, ku esnan di kompetensia te dilanti. Ta registrá e ora na final, manera a sosodé den pasado tambe. Pa e chikitinnan (te 12 aña) por kompetí  kubriendo 500 meter ku salida mitar di 12 for di playa di Lions Dive Hotel pa Wet & Wild

Surf
Despues di dos aña eksitoso di kompetensia di sùrf, kaminda Surf for the Roses tabata tuma lugá for di Klein Curaçao pa Wet & Wild na Mambo, a plania e sekshon aki pa mas lat e aña aki. A hasi esaki pasobra ta e mesun persona i instansianan i di seguridat ta envolví pa e landadónan for di Jan Thiel.

Pa mas detaye tokante registrashon, pago, patrosinio i donashon esnan interesá por akudí na website di Ride: www.ridefortheroses.net. Tene na mente ku e rekoudashon di e aktividatnan aki ta na benefisio di pashèntnan di kanser na Kòrsou i nan famia.